అలా ఎలా అంటారు?: పెటాపై సూర్య ఆగ్రహం, నోటీసులు
జంతు హక్కుల సంస్థ (పెటా)కు ప్రముఖ సినీనటుడు సూర్య శనివారం నోటీసులు ఇచ్చారు.
చెన్నై: జంతు హక్కుల సంస్థ (పెటా)కు ప్రముఖ సినీనటుడు సూర్య శనివారం నోటీసులు ఇచ్చారు. జల్లికట్టుకు సినీ పరిశ్రమ మద్దతును 'పెటా' తప్పుపట్టడంపై ఆయన తీవ్ర ఆగ్రహం వ్యక్తంచేశారు.
సినిమాల ప్రచారానికే జల్లికట్టుకు మద్దతు ఇస్తున్నారని ఆ సంస్థ ఎలా చెబుతోందని సూర్య ప్రశ్నించారు. తమిళుల సంప్రదాయ క్రీడ జల్లికట్టుపై నిషేధం విధిస్తూ సుప్రీంకోర్టు నిర్ణయాన్ని వ్యతిరేకిస్తూ తమిళనాడు రాష్ట్రవ్యాప్తంగా నిరసనలు వెల్లువెత్తుతున్న విషయం తెలిసిందే.
ఇతర రాష్ట్రాల్లోనూ తమిళులు జల్లికట్టును అనుమతించాలంటూ ఆందోళనలు చేస్తున్నారు. కాగా, చెన్నైలోని మెరీనా తీరానికి చేరుకున్న వేలాదిమంది యువకులు, విద్యార్థులు జల్లికట్టును అనుమతించాల్సిందేనని పట్టుబడుతున్నారు. వారి ఆందోళన గత నాలుగు రోజుల నుంచి జరుగుతోంది.
కాగా, ఈ ఉద్యమానికి సినీ పరిశ్రమకు చెందిన ప్రముఖులు రజినీకాంత్, అజిత్, కమల్హాసన్, సూర్య, లారెన్స్, ఏఆర్ రహమాన్ సహా పలువురు మద్దతుగా నిలిచారు. ఇది ఇలా ఉండగా, జల్లికట్టు అనుమతికి తమిళనాడు పంపిన ఆర్డినెన్స్కు కేంద్రం సానుకూలంగా స్పందించింది.