దీన్ని అరెస్ట్ చేయండి: మహిళా జర్నలిస్ట్‌ను తిట్టిన ఎమ్మెల్యే

న్యూఢిల్లీ: ఓ మీడియాకు చెందిన మహిళా ప్రతినిధిని కర్నాటక ఎమ్మెల్యే అశోక్ ఇష్టం వచ్చినట్లుగా తిట్టాడు. ఓ సమాచారానికి సంబంధించి ఆమె ఆయనను ప్రశ్నించగా... దీనిని అరెస్టు చేయండి అని అసభ్య పదజాలం ఉపయోగించాడు. ఈ నేపథ్యంలో లిఖితపూర్వకంగా క్షమాపణ చెప్పాలని డిమాండ్ చేశారు.

రాజ్యసభ ఎన్నికలు ఈ నెల 11న జరగనున్న నేపథ్యంలో కన్నడ నాట ఆసక్తికర రాజకీయం కనిపిస్తోంది. రూ.5 కోట్లిస్తే మా ఓటు మీకేనంటూ తమను సంప్రదించిన వైరి పక్షాల నేతలకు చెప్పిన ఆ రాష్ట్రానికి చెందిన ఐదుగురు ఎమ్మెల్యేలు స్టింగ్ ఆపరేషన్‌కు అడ్డంగా దొరికిపోయారు.

ఈ క్రమంలో అక్కడ ఎన్నికలను వాయిదా వేయాలన్న దిశగానూ కేంద్ర ఎన్నికల సంఘం యోచించింది. అయితే పకడ్బందీ ఏర్పాట్ల మధ్య ఎన్నికలు నిర్వహించేందుకే ఎన్నికల సంఘం నిర్ణయించింది. ఈ క్రమంలో స్టింగ్ ఆపరేషన్‌కు దొరికిపోయిన స్వతంత్ర ఎమ్మెల్యే అశోక్ ఖేనీ ఓ మహిళా జర్నలిస్టుపై నోరు పారేసుకున్నారు.

స్టింగ్ ఆపరేషన్‌కు సంబంధించిన తనను ప్రశ్నించిన ఓ మహిళా జర్నలిస్టుపై ఆయన దుర్బాషలాడారు. ఈ వీడియో కూడా నేషనల్ మీడియాలో వైరల్‌గా మారింది.

'అరెస్టడ్ కరో సాలీకో' (దీనిని అరెస్ట్ చేయండి) అని అసభ్యంగా మాట్లాడాడు. ఈ వ్యాఖ్యలు ప్రత్యక్షంగా వీడియోలో రికార్డ్ అయ్యాయి. అనంతరం సోషల్ మీడియాలోకి ఎక్కాయి.

ఈ విషయాన్ని తాము అంత తేలిగ్గా వదిలేది లేదని, ఓ ఎమ్మెల్యే స్థానంలో ఉన్న వ్యక్తి ఎలాంటి భాష ఉపయోగించి మాట్లాడాడో అందరికీ తెలియజేయాలని నిర్ణయించుకున్నట్లు టైమ్స్ నౌ మీడియా సంస్థ తెలిపింది. చానల్ ఎడిటర్ ఇన్ చీఫ్ అర్నాబ్ గోస్వామి మాట్లాడుతూ.. సదరు ఎమ్మెల్యే లిఖితపూర్వక క్షమాపణలు చెప్పాలని డిమాండ్ చేశారు.

English summary

After Karnataka MLA Abuses Female Reporter, Arnab Goswami Calls Him Up On Air, Asks Him To Apologise.