అమిగోస్ సినిమా రివ్యూ: కల్యాణ్ రామ్ త్రిపాత్రాభినయం థ్రిల్ ఇచ్చిందా... లేదా ?

By Bbc Telugu

Updated: Friday, February 10, 2023, 19:54 [IST]

కల్యాణ్ రామ్‌ను ద్వితీయ విఘ్నాలు తొలి నుంచి వెంటాడుతున్నాయి. ఒక విజయం తర్వాత మళ్లీ వరుసగా అపజయాలు. 'పటాస్' తో ఫామ్ లోకి వస్తే.. ఆ తర్వాత చేసిన సినిమాలు వరుసగా నిరాశ పరిచాయి.

'బింబిసార'తో విజయం అందుకున్న కల్యాణ్ రామ్.. ఈసారి ఎలాగైనా ద్వితీయ విఘ్నాన్ని దాటాలని... 'అమిగోస్'తో ప్రేక్షకుల ముందుకు వచ్చాడు. ఈ సినిమా కోసం కెరీర్‌లో తొలిసారి త్రిపాత్రాభినయం చేశాడు.

ట్రైలర్ సినిమా చూడాలనే ఆసక్తిని పెంచింది. మరి ట్రైలర్‌లో కనిపించిన ఆసక్తి సినిమాలో కొనసాగిందా?

ముగ్గురు ముగ్గురే

సిద్ధు (కళ్యాణ్ రామ్) తన ఫ్యామిలీ బిజినెస్ చూస్తూ ఉంటాడు. అతనికి ఇంట్లో పెళ్లి సంబంధాలు చూస్తుంటారు కానీ ఎవరూ నచ్చరు. తను కోరుకునే క్యాలిటీలు ఉన్న అమ్మాయిని పెళ్లి చూసుకోవాలని సిద్ధు కోరిక.

ఇషిక (ఆషికా రంగనాథ్) ఆర్జే. తను కూడా కాబోయే భర్తలో కొన్ని క్యాలిటీలని కోరుకుంటుంది. ఇషికని చూసి తొలి చూపులోనే ఇష్టపడతాడు సిద్ధు. అయితే పెళ్లికి ఒప్పుకోవాలంటే మాత్రం సిద్ధుకి కొన్ని కండీషన్లు పెడుతుంది.

ఇదే సమయంలో డోపెల్‌గాంజర్స్ అనే ఓ వెబ్ సైట్ ద్వారా అచ్చం తన పోలికలతో ఉన్న మంజునాథ్, బిపిన్ రాయ్ సిద్ధుకి పరిచయం అవుతారు. సిద్ధు జీవితంలోకి ఈ ఇద్దరు రావడంతో అతని పెళ్లి సమస్య తీరిపోతుంది.

అయితే ఇదే సమయంలో బిపిన్ రాయ్ రూపంలో ఓ ప్రమాదం వచ్చి పడుతుంది. అసలు బిపిన్ రాయ్ ఎవరు? సిద్ధు జీవితంలోకి అతడి రాకతో ఎలాంటి సమస్యలు తలెత్తాయి? ఈ సమస్యల నుంచి సిద్ధు ఎలా బయటపడ్డాడనేది మిగతా కథ.

ఒకే పోలికలతో వున్న ముగ్గురి కథ ఇది. ఒకే పోలికలతో ఉన్న వ్యక్తులని డోపెల్‌గాంజర్స్ అంటారు. అయితే ఈ మాట కొందరికి కొత్తగా పరిచయం అవుతుందేమో కానీ ఇలాంటి కథలు మాత్రం ప్రేక్షకులు ఇది వరకే చూశారు.

ఒకే పోలికలతో ఉన్న ముగ్గురు ఒకరి స్థానంలో మరొకరు వచ్చి అవసరాలకు తగ్గట్టు నటించడం గతంలో చాలా కథల్లో చూశాం. అయితే అమిగోస్‌లో మాత్రం ముగ్గురిని కలిపిన పద్ధతి బాగుంది. తర్వాత డ్రామా నడిపించే విధంగా స్క్రీన్ ప్లే రాసుకున్నాడు దర్శకుడు. ఇది కాస్త కొత్తగా అనిపించినా.. దానిని కొనసాగించడంలో చాలా చోట్ల సాగదీత కనిపిస్తుంది.

ఒకే పోలికలతో ఉన్న ముగ్గురు కలవడంతో అసలు కథ మొదలవుతుంది. అయితే ఈ పాయింట్ చేరుకోవడానికి ముందు దర్శకుడు ప్రేమకథతో చాలా కాలయాపన చేశాడు. అమిగోస్ ఒక థ్రిల్లర్. ఈ కథలో లవ్ ట్రాక్‌కి అంత ప్రాధాన్యం లేదు. అలాంటప్పుడు ఆ ట్రాక్‌ను షార్ప్‌గా తీయాల్సింది. కానీ అలా జరగలేదు.

ఒకే పోలికతో ఉన్న ముగ్గురు కలవడం.. ఎన్ఐఎ అధికారులు రంగంలోకి దిగడంతో.. విరామం ఘట్టం కూడా ప్రేక్షకుడి ఊహకి అందిపోతుంది. అయినప్పటికీ ఆ ఎపిసోడ్ని కాస్త ఆసక్తిగానే డిజైన్ చేశాడు దర్శకుడు.

థ్రిల్ వుంది కానీ..

విరామం తర్వాత వచ్చే బిపిన్ రాయ్ ఫ్లాష్ బ్యాక్ ఎపిసోడ్ ఆసక్తికరంగా ఉంటుంది. ఇండియన్ పాబ్లో ఎస్కోబార్‌గా ఆ పాత్రని చాలా పవర్ ఫుల్‌గా పరిచయం చేశారు. అయితే దాన్ని కొనసాగించడంలో దర్శకుడిలో తడబాటు కనిపించింది.

పైగా, దర్శకుడు కథకి సహజంగా కాకుండా తనకి అనుకూలంగా చాలా సన్నివేశాలని రాసుకుంటూ వెళ్ళాడు. ఎన్ఐఎ ప్రవేశించిన ఓ కేసులో విచారణ చాలా పటిష్టంగా ఉంటుంది. కానీ వాళ్లు అసలు విచారించినట్లే కనిపించదు.

మంజునాథ్ పాత్రని అమాయకంగా తీర్చిదిద్ది ఒక సింపతీని క్రియేట్ చేయాలనే దర్శకుడు ఆలోచన అంతగా ఫలించలేదు.

ఫస్ట్ హాఫ్‌లో థ్రిల్‌కు లవ్ ట్రాక్ అడ్డు తగిలితే సెకండ్ హాఫ్‌లో ప్రీక్లైమాక్స్ అవరోధంగా మారింది. బిపిన్ ఎన్ఐఎ అధికారులకు దొరికినపుడే ఈ కథ అయిపోతుంది. కానీ అక్కడ పెద్ద యాక్షన్ సీన్ పెట్టి ఇంకో ఇరవై నిమిషాలు సాగదీశారు. ఇక క్లైమాక్స్‌లో కూడా ఏం జరుగుతుందో ప్రేక్షకులకు ముందే ఒక ఐడియా వుంటుంది.

అయితే చివరికి క్లైమాక్స్ ఫైట్‌ను కూడా సాగదీసి రొటీన్ గానే ముగించారు. అలా కాకుండా వాటి నిడివి తగ్గించుంటే ఆడియన్స్‌కు థ్రిల్ కలిగేదే.

అమిగోస్ విషయంలో దర్శకుడిని మెచ్చుకోదగ్గ విషయాలు కూడా వున్నాయి. ఇలాంటి కథల్లో పాత్రలు అవసరాలకు తగట్టు మారిపోతుంటాయి. పాజిటివ్ పాత్ర సడన్‌గా నెగిటివ్ అయిపోతుంటుంది. కానీ దర్శకుడు ఆ జోలికి వెళ్ళలేదు. పాత్రలకి ఒకటే గ్రాఫ్‌ని కొనసాగించాడు. అలాగే ఒకే పోలికలతో వున్న పాత్రలని చూపిస్తున్నపుడు చాలా తికమక వుంటుంది. అమిగోస్‌ని మాత్రం ఎలాంటి కన్ఫ్యుజన్ లేకుండా నీట్‌గా ప్రజంట్ చేశాడు దర్శకుడు.

కల్యాణ్ రామ్ 'త్రీ' మెన్ షో

కల్యాణ్ రామ్ పోషించిన మూడు పాత్రల్లో ఒకటి ప్రతినాయకుడి లక్షణాలు ఉన్న పాత్ర. ఈ మూడు పాత్రల్లో తన గ్రేస్ చూపించాడు కల్యాణ్ రామ్. కల్యాణ్ రామ్‌కు నటించే అవకాశం ఇచ్చిన కథ ఇది. మూడు పాత్రల్లో స్పష్టమైన వైవిధ్యం చూపించాడు. రూబిన్ పాత్ర ఇందులో ప్రధాన ఆకర్షణ. ఆ గెటప్ బావుంది. యాక్షన్ సీన్స్‌లో తన యీజ్ చూపించాడు. అయితే రూబిన్ పాత్ర డైలాగ్ డెలివరీలో బింబిసార ఛాయలు కనిపించాయి.

ఆషికా రంగనాథ్ అందంగా వుంది. తన నటన డీసెంట్‌గా వుంది. బ్రహ్మాజీ పాత్ర కొన్ని నవ్వులు పంచుతుంది. తండ్రి పాత్రలో చేసిన జయప్రకాష్‌తో పాటు మిగత నటులు పరిధిమేర కనిపించారు.

నిర్మాణ విలువలు కథకు తగ్గట్టుగా ఉన్నాయి. జిబ్రాన్ సంగీతం ఓకే అనిపిస్తుంది. ఎన్నో రాత్రులోస్తాయి గానీ పాట కు మంచి స్పందన వచ్చింది. అయితే అది ఇళయరాజా, బాలకృష్ణల మ్యాజిక్.

సినిమా నేపథ్య సంగీతం థ్రిల్లర్‌కి తగట్టుగా ఉంది. సినిమాటోగ్రఫీ చక్కగా ఉంది. ఎడిటర్ ట్రిమ్ చేయాల్సిన సీన్లు ఉన్నాయి. యాక్షన్‌కి అంత లెంత్ అవసరం లేదనే భావన కలుగుతుంది. గుర్తుపెట్టుకునే మాటలు వినిపించలేదు.

'డోపెల్‌గాంజర్స్' అనే కాన్సెప్ట్ తో ఒక థ్రిల్లర్ చూపించాలనే ఆలోచన దర్శకుడిది. ఆలోచన బాగానే వుంది. అయితే ఈ థ్రిల్‌కి ప్రేమకథ అడ్డం తగిలింది. దీంతో పాటు మలుపులు ప్రేక్షకుల ఊహకు ముందే అందిపోవడం, ప్రీక్లైమాక్స్, క్లైమాక్స్ సాగదీయడంతో ఆ థ్రిల్ కాస్త పలచబడిపోయింది.