మాజీ ప్రేయురాలి న్యూడ్ ఫొటోను నెట్‌లో పెట్టాడు: అరెస్ట్

ముంబై: తనను వివాహం చేసుకునేందుకు అంగీకరించలేదనే కోపంతో తన మాజీ ప్రియురాలి నగ్న చిత్రాన్ని సోషల్ నెట్‌వర్క్ సైట్‌లో అప్‌లోడ్ చేశాడు ఓ ప్రబుద్ధుడు. బాధితురాలు ఇచ్చిన ఫిర్యాదు మేరకు కేసు నమోదు చేసుకున్న పోలీసులు, దర్యాప్తు జరిపి నిందితుడ్ని అరెస్ట్ చేశారు. ఈ ఘటన మహారాష్ట్రలోని ముంబైలో చోటు చేసుకుంది.

విపి రోడ్‌లోని సిక్కా నగర్‌కు చెందిన నిశ్చయ్ బన్సల్(24), బాధిత యువతి ఒకే పాఠశాలలో చదువుకున్నారు. దీంతో వారి పరిచయం వారితోపాటు పెరిగి ప్రేమగా మారింది. 2011లో బాధితురాలు తన ఇంట్లో ఒంటిరిగా ఉన్న సమయంలో తన సెల్ఫీ ఫొటోలను తీసుకుంది. ఆ ఫొటోలను ఎవరితోనూ షేర్ చేయలేదు. కాగా, నిశ్చయ్ బన్సల్ ఆమెకు తెలియకుండా ఆ ఫొటోలను ఆమె సెల్‌ఫోన్‌ నుంచి తన సెల్ ఫోన్‌లోకి ఎక్కించాడు.

ఆ తర్వాత కొన్ని రోజులకు ఆ ఫొటోలను ఆమెకు చూపించాడు. దీంతో ఆమె వెంటనే ఆ ఫొటోలను డిలీట్ చేయాలని కోరింది. అందుకు అతడు అంగీకరించకపోవడంతో వారి మధ్య తీవ్ర వాగ్వాదం చోటు చేసుకుంది. ఈ నేపథ్యంలో బాధిత యువతి అతనితో తన బంధాన్ని తెంచుకుంది. మళ్లీ తమ బంధాన్ని కొనసాగిద్దామని నిశ్చయ్ ఆమె వెంటపడ్డాడు. అయినా ఆమె అంగీకరించలేదు. దీంతో ఆమెకు సంబంధించిన నగ్న ఫొటోను నెట్‌లో అప్‌లోడ్ చేశాడు.

అంతేగాక, 2013, అక్టోబర్‌లో ఆమెకు వివాహం నిశ్చయమైందని తెలుసుకున్న నిశ్చయ్ బన్సల్ ఆమెకు పలు బెదిరింపు మెసేజ్‌లు పంపించాడు. 2013, నవంబర్‌లో ఆమెకు కాబోయే భర్త వివరాలను తెలసుకున్న నిశ్చయ్.. అతనికి ఆమెకు సంబంధించిన ఫొటోలను చూపించాడు. ఆమెతో తనకు శరీరక సంబంధం ఉందని నిశ్చయ్ చెప్పడంతో ఆ పెళ్లి రద్దయింది. దీంతో బాధిత యువతి నిశ్చయ్ వేధింపుల గురించి కుటుంబసభ్యులకు తెలిపింది. బాధితురాలితో కలిసి పోలీసులకు ఫిర్యాదు చేయడంతో దర్యాప్తు జరిపిన పోలీసులు, నిందితుడ్ని శనివారం అరెస్ట్ చేసి కేసు నమోదు చేశారు.

English summary

A garment trader from Girgaum, who allegedly uploaded a photograph of his former girlfriend in a state of undress on a social networking site after she refused to marry him, was arrested by the police on Saturday.