శభాష్ చిన్ను: నాగుపాముకు అడ్డుగా నిలిచి, ఫ్యామిలీని కాపాడిన పిల్లి..

Published: Friday, July 23, 2021, 9:16 [IST]

నాగుపాము అంటే ఎగిరి గంతేస్తాం.. ఎవరో ఒకరిద్దరూ సాహసం చేసి పట్టుకుంటారు.. లేదంటే చంపుతారు. కానీ ఓ పెంపుడు పిల్లి.. నాగుపాముకు ఎదురొడ్డి నిలిచింది. ఎదురుగా ఉండి.. కుటుంబాన్నే కాపాడింది. ఒడిశాలో ఈ ఘటన జరగగా.. ఆ వీడియో ఇప్పుడు సోషల్ మీడియాలో చక్కర్లు కొడుతోంది. ఆ తర్వాత పాములు పట్టేవారు వచ్చి.. నాగుపామును పట్టారు. తర్వాత సంచిలో తీసుకెళ్లి అడవీలో వదిలేశారు.

నాగుపాము పడగ విప్పి

భీమసాంగిలో ఈ ఘటన జరిగింది. సంపత్ కుమార్ అనే వ్యక్తి ఇంట్లోకి ఓ నాగుపాము వచ్చింది. పెరట్లోకి వస్తున్న ఆ విషసర్పాన్ని సంపత్ కుమార్ పెంపుడు పిల్లి చిన్ను గుర్తించింది. వెంటనే ఆ పామును అడ్డుకుంది. పిల్లిపై దాడి చేసేందుకు ఆ నాగు పడగ విప్పి ఉగ్రరూపం దాల్చింది. అయినా ఆ పిల్లి వెనుకంజ వేయలేదు. అలాగే ఎదురొడ్డి నిలిచింది.

కుక్క అరవడంతో

ఇంతలో అక్కడే ఉన్న ఓ కుక్క అరవడంతో సంపత్ కుమార్, ఇతర కుటుంబ సభ్యులు వచ్చి చూశారు. బుసలు కొడుతూ తాచుపాము కనిపించింది. దాని ఎదురుగా ల్లి కనిపించింది. సంపత్ కుమార్ స్నేక్ వలంటీర్‌కు సమాచారం అందించాడు. ఆ స్నేక్ వలంటీర్ వచ్చేంతరకు నాగుపామును ఎటూ కదలనివ్వకుండా పిల్లి అక్కడే కూర్చుంది. ఇంతలో స్నేక్ వలంటీర్ వచ్చి చాకచక్యంగా పామును పట్టుకున్నాడు. తర్వాత అటవీప్రాంతంలో వదిలేశాడు.

అడ్డుగా నిలిచిన పిల్లి

ఆ పెంపుడు పిల్లి చిన్ను స్థానికంగా ఓ హీరో అయింది. నాగుపాము ఎదురుగా నిలిచి తన విశ్వాసాన్ని చాటుకుంది. వాస్తవానికి శునకం అంటేనే విశ్వాసం అంటారు. కానీ ఈ సారి పిల్లి కూడా అత్యంత విశ్వాసంగా మలచుకుంది. అయితే నాగుపాము.. పిల్లిని కరిచిందేమోనని పరీక్షలు కూడా చేయించారు. ఎలాంటి కాటు పడలేదని తెలిసి లోలోన సంబరపడ్డారు.

వీడియో వైరల్

ఈ వీడియో సోషల్ మీడియాలో వైరల్ అయ్యింది. నెటిజన్లు హ్యాట్సాప్ అంటున్నారు. ఆ చిన్ను కుటుంబానికే అండగా నిలిచిందని ప్రశంసిస్తున్నారు. విష సర్పం బారి నుంచి కుటుంబాన్నే కాపాడిందని పేర్కొన్నారు.

Published On July 23, 2021