చైల్డ్ పోర్న్ వెబ్సైట్స్: కోట్లు ఆర్జిస్తున్న దంపతుల అరెస్ట్
చెన్నై: చిన్న పిల్లలకు సంబంధించిన పోర్న్ వీడియోలను పొందుపరుస్తూ రెండు పోర్న్ వెబ్సైట్ను నిర్వహిస్తున్న ఓ వ్యక్తిని, అతని భార్యను చెన్నైలో సైబర్ క్రైం, సిబి సిఐడి పోలీసులు అరెస్ట్ చేశారు. అంతేగాక, ఆ వెబ్సైట్లో సభ్యత్వం పేరిట చాలా మంది దగ్గర భారీ మొత్తంలో డబ్బులు వసూలు చేసినట్లు పోలీసులు గుర్తించారు.
నిందితులు నిర్వహిస్తున్న రెండు పోర్న్వెబ్ సైట్లలోనూ పిల్లలకు సంబంధించిన అశ్లీల ఫొటోలను, వీడియోలను అప్లోడ్ చేస్తున్నట్లు పోలీసులు మంగళవారం మీడియాకు తెలిపారు. తమకు అందిన పక్కా సమాచారం నిందితులను అరెస్ట్ చేసినట్లు చెప్పారు.
తమ విచారణలో కూడా పోర్న్ వెబ్సైట్లతో నిందితులు సిద్ధాత్త వేలు, అతని భార్య ప్రెసిల్లా మార్గరెట్ ధనరాజ్లకు సంబంధం ఉన్నట్లు తేలిందన్నారు. వారి ఈమెయిల్ ఐడీలు కూడా ఆ వెబ్సైట్లకు లింక్ అయి ఉన్నాయని చెప్పారు.
'నిందితులు నిర్వహిస్తున్న వెబ్ సైట్లలో సభ్యత్వం కోసం పలువురు ఇప్పటి వరకు రూ. 2.4కోట్లు చెల్లించినట్లు తేలింది. ఈ మొత్తం సిద్దాత్త వేలుకు సంబంధించిన బెంగళూరు బ్యాంకు ఖాతాలో జమ అయినట్లు గుర్తించాం' అని పోలీసులు తెలిపారు.
ఐటి చట్టం కింద నిందితులపై కేసు నమోదు చేసినట్లు చెప్పారు. నిందితులు నివాసముంటున్న చెన్నైలోని షోలింగనల్లూరులో సోదాలు నిర్వహిస్తున్నట్లు తెలిపారు. వారి వద్ద ఉన్న పోర్న్ కంటెంట్ను స్వాధీనం చేసుకున్నట్లు చెప్పారు.