కాక్రోచ్ దెబ్బకి దద్దరిల్లిన దిల్లీ.. జూన్ 23న మరో నిరసన..
"ఈ దేశ యువత ఇక ఎంతమాత్రం భయపడదు, తమ హక్కుల కోసం పోరాడుతుంది. బొద్దింకలు కూడా దేనికీ భయపడవు, అవి ఎప్పటికీ చావవు కూడా," అంటూ కాక్రోచ్ జనతా పార్టీ (CJP) వ్యవస్థాపకుడు అభిజీత్ దిప్కే ధ్వజమెత్తారు. దిల్లీలోని జంతర్ మంతర్ వద్దకు ఏర్పాటు చేసిన నిరసన కార్యాక్రమాన్ని ఉద్దేశించి ఉద్వేగభరితంగా ప్రసంగించారు. నీట్, సీబీఎస్ఈ పరీక్షల్లో జరిగిన అక్రమాలకు బాధ్యత వహిస్తూ విద్యాశాఖ మంత్రి ధర్మేంద్ర ప్రధాన్ తక్షణమే రాజీనామా చేయాలని డిమాండ్ చేస్తూ నిరసనకారులు పెద్ద పెట్టున నినాదాలు చేశారు. "ధర్మేంద్ర ప్రధాన్ రాజీనామా చేయాలి", "ధర్మేంద్ర ప్రధాన్, రాజీనామా చెయ్!" అనే నినాదాలతో పాటు "జై భీమ్" అంటూ జంతర్ మంతర్ ప్రాంగణం హోరెత్తింది.
విద్యార్థుల, యువత డిమాండ్లను పరిష్కరించడం పక్కన పెట్టి, తమ సంస్థ సోషల్ మీడియా కార్యకలాపాలపై కేంద్ర ప్రభుత్వం దృష్టి పెట్టడంపై అభిజీత్ దిప్కే తీవ్రంగా మండిపడ్డారు. "మిత్రులారా, ఇది చాలా సుదీర్ఘమైన పోరాటం. సోషల్ మీడియా ద్వారా మేము మంత్రి ధర్మేంద్ర ప్రధాన్ రాజీనామాను డిమాండ్ చేయడం ప్రారంభించి నెల రోజులు అవుతోంది. కానీ ఈ పాలకులు ఎంత సిగ్గులేకుండా ప్రవర్తిస్తున్నారంటే.. చర్యలు తీసుకోవడానికి బదులుగా మా అకౌంట్లను హ్యాక్ చేయడం, మా పోస్ట్లను డిలీట్ చేయించడం వంటి ఇతర పనులపై శ్రద్ధ పెడుతున్నారు. మీరు మా సోషల్ మీడియా పోస్ట్లను డిలీట్ చేయగలరేమో కానీ, ఈ క్షేత్రస్థాయి పోరాటం నుంచి మమ్మల్ని చెరిపివేయలేరు" అని ఆయన కేంద్ర ప్రభుత్వాన్ని హెచ్చరించారు.
జూన్ 23న రామ్లీలా మైదానంలో మరో నిరసన
శనివారం జరిగిన మొదటి విడత నిరసన కార్యక్రమం విజయవంతం కావడంతో, కాక్రోచ్ జనతా పార్టీ తన తదుపరి పోరాటానికి ప్రణాళిక సిద్ధం చేసింది. జూన్ 23వ తేదీన న్యూఢిల్లీలోని సుప్రసిద్ధ రామ్లీలా మైదానంలో భారీ ఎత్తున మరో నిరసన ప్రదర్శన, సభను నిర్వహించేందుకు సన్నద్ధమవుతోంది.
జంతర్ మంతర్ వద్ద ఉద్రిక్తత.. 'జై శ్రీరామ్' నినాదాలు
ఇదిలావుండగా, శనివారం జంతర్ మంతర్ నిరసనల వద్ద స్వల్ప ఉద్రిక్తత చోటుచేసుకుంది. కాక్రోచ్ జనతా పార్టీ, దానికి మద్దతు ఇస్తున్న వారిపై చర్యలు తీసుకోవాలని డిమాండ్ చేస్తూ కొందరు నిరసనకారులు 'జై శ్రీరామ్' నినాదాలు చేస్తూ జంతర్ మంతర్ ప్రాంగణంలోకి ప్రవేశించడానికి ప్రయత్నించారు. అయితే, అక్కడ మోహరించి ఉన్న దిల్లీ పోలీసులు వెంటనే స్పందించి, వారిని సురక్షితంగా అక్కడి నుంచి బయటకు పంపించి వేశారు.
అభిజీత్ దిప్కే నివాసం వద్ద భారీ భద్రత
మరోవైపు మహారాష్ట్రలోని ఛత్రపతి శంభాజీనగర్ లోని వాలుజ్ ఎంఐడీసీ (Waluj MIDC) ప్రాంతంలో ఉన్న అభిజీత్ దిప్కే నివాసం వద్ద పోలీసులు భద్రతను కట్టుదిట్టం చేశారు. శనివారం ఈ వివరాలను వెల్లడించిన ఒక పోలీస్ అధికారి.. దిప్కే నివాసం వద్ద అనవసరంగా జనాలు గుమిగూడకుండా, ఎలాంటి అవాంఛనీయ సంఘటనలు జరగకుండా నిరోధించేందుకు భద్రతా ఏర్పాట్లను పెంచినట్లు తెలిపారు. ప్రస్తుతం వాలుజ్ ప్రాంతంలో ఉన్న ఆ ఇంట్లో అభిజీత్ దిప్కే తల్లిదండ్రులు ఎవరూ ఉండటం లేదని సదరు అధికారి అదనంగా పేర్కొన్నారు
Click it and Unblock the Notifications
Sign in with Google