Jio: దేశవ్యాప్తంగా జియో నెట్ వర్క్ డౌన్..!

జియో టెలికామ్ రంగంలో భారీ మార్పును తెచ్చిన సంగతి తెలిసిందే. తొలుత ఉచితంగా సేవలు అందించిన సంస్థ తర్వాత ఛార్జీలు వసూలు చేసింది. జియో తక్కువ సమయంలోనే అత్యధిక మంది యూజర్లను సాధించింది. ప్రస్తుతం జియో 5జీ సర్వీసులు కూడా అందిస్తోంది. అయితే వినియోగదారులు భారీగా పెరిగిపోవడంతో వారికి తగ్గట్లు సేవలు అందించడం లేదని ఆరోపణలు వస్తున్నాయి. చాలా చోట్ల జియో సిగ్నల్ రావడం లేదని వినియోగదారులు చెబుతున్నారు.

సిగ్నల్ వచ్చినా నెట్ రావడం లేదని సోషల్ మీడియాలో ఫిర్యాదు చేస్తున్నారు. చాలా చోట్ల 5జీ రావడం లేదని జియో కస్టమర్ కేర్ ఫోన్లు వస్తున్నట్లు తెలుస్తోంది. తాజాగా మంగళవారం కూడా జియో యూజర్లు తీవ్రమైన అసౌకర్యానికి గురైనట్లు తెలుస్తోంది. దేశవ్యాప్తంగా సెప్టెంబర్ 17న జియో నెట్ వర్క్ తగ్గిపోయినట్లు తెలుస్తోంది. ముంబైలో జియో వినియోగదారులు సిగ్నల్ రాక తీవ్ర ఇబ్బందులు పడ్డారు. దీంతో జియో వాడుతున్న వార అసహనంతో ఎక్స్ లో పోస్ట్ చేస్తున్నారు.

మధ్యాహ్నం 12.36కి 10,367 జియో యూజర్లు నెట్వర్క్ ఎర్రర్ సమస్యను ఎదుర్కొన్నట్లు సోషల్ మీడియాలో పోస్ట్ చేశారు. ఉదయం 10.13 నిమిషాలకు ఏడుగురు, 11.13 నిమిషాలకు 653 మంది జియో వినియోగదారుల నుంచి ఫిర్యాదులు వచ్చాయి. 68 శాతం మందికి నో సిగ్నల్, 18 శాతం మందికి మొబైల్ ఇంటర్నెట్ సమస్య ఎదురైనట్లు పేర్కొంటున్నారు. అలాగే 14 మంది బ్రాడ్ బ్యాండ్ వినియోగదారులు కూడా సమస్యలు ఎదుర్కొన్నట్లు వివరించారు.

మిగిలిన నెట్ వర్కులైన ఎయిర్ టెల్, వొడాఫోన్ ఐడియా, బీఎస్ఎన్ఎల్ నెట్ వర్క్ లు బాగానే పని చేశాయి. జియో వినియోగదారులకు తగ్గట్లుగా టవర్లను ఏర్పాటు చేయలేదని విమర్శలు వస్తున్నాయి. హైదరాబాద్ లో కూడా పలువురు వినియోగదారులు 5జీ నెట్ రాక ఇబ్బంది పడుతున్నట్లు సోషల్ మీడియాలో పోస్టులు చేస్తున్నారు. కొన్ని ఊళ్లలో జియో సిగ్నల్ రావట్లేదని చెబుతున్నారు.

English summary

Jio users were in serious trouble on Tuesday afternoon. They complained on social media about the arrival of signals.