ఢిల్లీ అత్యాచారం కేసు: ఐదుగురు దోషులకు జీవిత ఖైదు

న్యూఢిల్లీ: ఢిల్లీలోని ధౌలా క్వాన్ ప్రాంతంలో నాలుగేళ్ల క్రితం జరిగిన సామూహిక అత్యాచారం కేసులో ఐదుగురు దోషులకు జీవిత ఖైదును శిక్షగా విధిస్తూ ఈరోజు ఢిల్లీ సెషన్స్ కోర్టు తీర్పునిచ్చింది. ఈ ఐదుగురిని దోషులుగా నిర్దారిస్తూ గత వారం తీర్పుని వెలువడించిన విషయం తెలిసిందే.

పోలీసులు వెల్లడించిన కథనం ప్రకారం 2010 నవంబర్ 24వ తేదీన కాల్ సెంటర్‌లో ఉద్యోగం చేసే ఈశాన్య రాష్టాలకు చెందిన 30 ఏళ్ల మహిళ సాయంత్రం నడిచి ఇంటికి వెళుతుండగా ఐదుగురు వ్యక్తులు ఆమెపై మంగోల్‌పురి ప్రాంతంలో సామూహిక అత్యాచారానికి పాల్పడి నిర్మానుష్య ప్రాంతంలో ఆమెను పడేసి వెళ్లిపోయారు.

ఆ తర్వాత ఈ ఐదుగురిని హర్యానాలోని మేవాట్‌‌లో అరెస్టు చేసినట్లు పోలీసులు తెలిపారు. విచారణ సమయంలో మేము అమాయకులమని, ఎవరో కావాలనే ఈ కేసులో మమ్మల్ని ఇరికించారని వెల్లడించినట్లు పోలీసులు చెప్పారు.

ఈ కేసులో ఐదుగురు నిందితులైన శంషాద్ ఆలియాస్ కుటకన్, ఉస్మాన్ అలియాస్ ఖాలీ, షాహిద్ అలియాస్ ఛోటా బిల్లి, ఇక్బాల్ అలియాస్ బడా బిల్లి, కమ్రుద్దిన్‌లను నేడు దోషులుగా ఢిల్లీ సెషన్స్ కోర్టు జడ్జి వీరేందర్ భట్ నిర్దారించారు. ఈ సంఘటన జరిగిన తర్వాత న్యూఢిల్లీలోని నేషనల్ క్యాపిటల్ రీజియన్‌లో ఉన్న కాల్ సెంటర్ కంపెనీలు తమ ఉద్యోగస్తులను సెక్యూరిటీతో పాటుగా ఇంటి వరకు దిగబెడుతున్నాయి.

English summary

Five men have been sentenced to life in prison for gang-raping a call centre worker in Delhi in 2010. The case brutally underscored the urgent need for better conditions for women working the late shift at the many BPOs in and around the capital.