యాసిడ్ దాడితో విలవిల.. ముఖానికి 17 సర్జరీలు.. ఒక్క రాంగ్ కాల్ తో లైఫ్ ఛేంజ్

అప్పటివరకూ ఆడుతూ పాడుతూ సరదాగా గడిపిన ఆ యువతి.. ఒక్క క్షణంలో జీవితం తలకిందులుగా మారింది. యాసిడ్ దాడి ఆమె జీవితాన్ని నాశనం చేసింది. 17 సర్జరీలు చేసినా ఆమె తన ముఖాన్ని తిరిగి పొందలేక పోయింది. బయటకు వెళ్లలేని పరిస్థితి.. కొందరు ఆమెను చూసి జాలి పడుతుంటే..మరికొందరు చూసి నవ్వుకునే వారు.అయినా ఎందుకు బతికున్నానా..? అని బాధపడలేదు. జీవితం పెట్టిన పరీక్షలన్నింటినీ తట్టుకుని నిలబడింది. చివరికి తాను ప్రేమించిన వ్యక్తిని వివాహం చేసుకుని సంతోషంగా జీవితాన్ని అనుభవిస్తోంది. ఈమె కథ ఎందరో యువతీయువకులకు స్ఫూర్తి నిస్తోంది.

లైఫ్ ను మార్చిన రాంగ్ నంబర్..

ఆమె పేరు లలితా బాన్సీ. ఈమెది ఉత్తర్ ప్రదేశ్ లోని ఆజామ్ గఢ్. 2012లో ఓ ఫంక్షన్ లో తన సోదరుడు ఆమెతో గొడవ పెట్టుకుని ఆమెపై యాసిడ్ దాడి చేశాడు. ఆ తర్వాత ఆమెకు 17 సర్జరీలు అయ్యాయి. అయినా తన ముఖం తిరిగి సాధారణ స్థితికి రాలేదు. దీంతో మార్పు కోసం ఆమె తన సొంత గ్రామం ఆజామ్ గఢ్ ను వదిలి మహారాష్ట్రలోని థానే కు వచ్చింది. ఓ రోజు లలిత రాంగ్ కాల్ చేసింది. ఒకరికి చేయాల్సిన కాల్.. నెంబర్ తప్పుగా ఎంటర్ చేయడంతో మరొకరికి వెళ్లింది. మొదట ఎవరూ ఫోన్ లిఫ్ట్ చేయలేదు. కానీ ఆ నెంబర్ నుండి లలితా బాన్సీ కు ఫోన్ వచ్చింది. ఆ ఫోన్ చేసింది ఎవరో కాదు మలాద్ లో సీసీటీవీ ఆపరేటర్ గా పనిచేస్తున్న రవి శంకర్ సింగ్. లలితా బాన్సీతో మాటలు కలిపాడు శంకర్. లలిత వాయిస్ నచ్చడంతో ఆమెతో రోజూ శంకర్ మాట్లాడేవాడు.

ఓ రోజు శంకర్ లలితకు ప్రొపోజ్ చేశాడు. దీంతో లలిత.. తనకు జరిగిన యాసిడ్ దాడిని, ఇప్పుడు ఆమె అనుభవిస్తున్న పరిస్థితిని భయపడకుండా పూర్తిగా వివరించింది. ఆమె చెప్పిన విషయాలన్నీ విన్న శంకర్.. " నేను నిన్ను ప్రేమిస్తున్నాను. నిన్ను పెళ్లిచేసుకోవాలని అనుకుంటున్నా. " అని లలిత కు చెప్పాడు. దీంతో వారి వివాహం 2017లో ముంబైలోని సహాస్ ఫౌండేషన్ ఆధ్వర్యంలో ఘనంగా జరిగింది. వీరి పెళ్లికి బాలీవుడ్ నటుడు వివేక్ ఓబేరాయ్ కూడా హాజరై శుభాకాంక్షలు తెలిపారు.

అయితే ఫిబ్రవరి 14 వాలెంటైన్స్ డే సమీపిస్తున్న క్రమంలో.. లలితా బాన్సీ వద్దకు కొన్ని నేషనల్ మీడియ ఛానల్స్ ఇంటర్వ్యూ చేసాయి. మరోసారి ఆమె మాటలు అందరినీ కలచివేశాయి. " అద్భుతాలు జరగడం అంటే ఇదేనేమో. యాసిడ్ బాధితురాలిని. 17 సార్లు సర్జరీ అయింది. నాకూ లవ్ దొరుకుందని నేను అనుకోలేదు. కానీ అది జరిగింది. ఇదంతా ఆ రాంగ్ కాల్ వల్లనే. ప్రేమను నమ్మాలని శంకర్ నాకు చెప్పాడు.ఇప్పుడు మేము సంతోషంగా ఉన్నాం" అని లలితా బాన్సీ ఎమోషనల్ అయింది.

ఇక శంకర్ మాట్లాడుతూ.."చాలామంది భార్యాభర్తల అందాన్ని చూసి పెళ్లిచేసుకుంటారు. అందుకే విడిపోతున్నారు. కానీ నేను లలితలో ప్రేమను చూశా. ఆమె మనసును చూశా. ఆమె మనసు స్వచ్ఛమైనది. అందుకే మేము వివాహం చేసుకున్నాం. అందం కంటే హార్ట్ ముఖ్యం." అని శంకర్ వివరించాడు.

లలితా బాన్సీ, శంకర్ ల నిజమైన ప్రేమకు నెటిజన్లు ఫిదా అవుతున్నారు. మీ లవ్ స్టోరీ ఎందరికో స్ఫూర్తినిస్తుందని.. ప్రేమతో దేన్నయినా జయించవచ్చని.. మీరు ట్రూ కపుల్ అంటూ కామెంట్స్ పెడుతున్నారు.

English summary

Emotional Lalita Bansi Shares Her Journey of Love and Survival After 17 Surgeries