అమ్మాయిని చంపిన సోదరులు, అబ్బాయి సూసైడ్

ముజఫర్‌నగర్: ఉత్తరప్రదేశ్ రాష్ట్రంలోని బుధానా పట్టణంలో దారుణం చోటు చేసుకుంది. 19 ఏళ్ల అమ్మాయిని కుటుంబ సభ్యులు దారుణంగా హత్య చేశారు. దాంతో మనస్తాపానికి గురైన అమ్మాయి ప్రియుడు ఆత్మహత్య చేసుకున్నాడు. పోలీసులు మంగళవారం ఈ విషయం చెప్పారు.

అమ్మాయి అదే పట్టణానికి చెందిన ముబారిక్ హసన్ అనే 21 ఏళ్ల యువకుడి ప్రేమలో పడింది. వారి మద్య సంబంధాన్ని అమ్మాయి కుటుంబ సభ్యులు వ్యతిరేకించారు. ఈ విషయంపై సోమవారంనాడు తీవ్ర వాగ్వివాదం చోటు చేసుకుంది. ఈ గొడవలో అమ్మాయిని గొంతు నులిమి చంపారు.

అత్మహత్యగా చిత్రీకరించేందుకు అమ్మాయి శవాన్ని సీలింగ్ ప్యాన్‌కు ఆమె సోదరులు అహసన్, ఆశు వేలాడదీసినట్లు ఎస్పీ (రూరల్) ఆలోక్ ప్రియదర్శిని మీడియా ప్రతినిధులకు చెప్పారు. కాగా, ఆమె బాయ్‌ఫ్రెండ్ శవం చెట్టుకు వేలాడుతూ కనిపించింది.

అమ్మాయిని గొంతు నులిమి చంపినట్లు, అబ్బాయి ఆత్మహత్య చేసుకున్నట్లు శవపరీక్షలో తేలిందని ఆయన చెప్పారు. అమ్మాయి సోదరులపై హత్యానేరం కింద కేసు నమోదు చేసినట్లు తెలిపారు.

English summary

In a case of honour killing a 19-year-old girl was killed allegedly by her family members while her boyfriend committed suicide after the incident at Budhana town here, police said Tuesday.