గోవాలో కాంగ్రెస్ పార్టీకి మరో షాక్... ఎమ్మెల్యే విశ్వజిత్ రాణె రాజీనామా ప్రకటన

గోవాలో కాంగ్రెస్ పార్టీకి మరో షాక్ తగిలింది. తాజాగా ఎమ్మెల్యే విశ్వజిత్ రాణె కాంగ్రెస్ పార్టీకి రాజీనామా చేస్తున్నట్లు ప్రకటించారు.

పనాజి: గోవాలో కాంగ్రెస్ పార్టీకి మరో షాక్ తగిలింది. గోవా ఎన్నికల్లో అతిపెద్ద పార్టీగా కాంగ్రెస్ అవతరించినా ప్రభుత్వాన్ని ఏర్పాటు చేయడంలో విఫలం కాగా, తాజాగా మాజీ ముఖ్యమంత్రి ప్రతాప్ సింగ్ రాణె కొడుకు, ఎమ్మెల్యే విశ్వజిత్ రాణె కాంగ్రెస్ పార్టీకి రాజీనామా చేస్తున్నట్లు ప్రకటించారు.

తానే కాదని, తన బాటలోనే మరి కొందరు కాంగ్రెస్ ఎమ్మెల్యేలు కూడా పార్టీని వీడనున్నారంటూ ఆయన మరో బాంబు పేల్చారు. తాజా ఎన్నికల్లో వాల్పోయి నుంచి ఎమ్మెల్యేగా గెలిచిన విశ్వజిత్ గత అసెంబ్లీలో ప్రతిపక్ష నేతగా ఉన్నారు. కాంగ్రెస్ సీనియర్ నాయకుల వైఖరి వల్లే తాను పార్టీ నుంచి వైదొలుగుతున్నట్లు ప్రకటించారు.

గోవా ఎన్నికల్లో కాంగ్రెస్ అత్యధిక సీట్లు గెలిచినా సీనియర్ నాయకుల అసమర్థత వల్లే ప్రభుత్వాన్ని ఏర్పాటు చేయలేకపోయామని ఆ పార్టీ ఎమ్మెల్యేలు ఆగ్రహంతో ఉన్నారు. ఎన్నికల తర్వాత సీనియర్ నాయకులు అనుసరించిన వైఖరి సిగ్గుచేటని, తనను తీవ్ర నిరాశకు గురిచేసిందని రాణె విమర్శించారు.

ఇందుకు కాంగ్రెస్ మూల్యం చెల్లించక తప్పదని, తన నియోజకవర్గ ప్రజలు మరోసారి ఆ పార్టీని గెలిపించరని అన్నారు. గోవా ఫార్వార్డ్ పార్టీ మధ్దతు ఇచ్చేందుకు ముందుకొచ్చినా.. కాంగ్రెస్ సీనియర్ నాయకులు సరైన నిర్ణయం తీసుకోలేకపోయారని, వారి అసమర్థతకు సిగ్గుతో తలదించుకోవాలని వ్యాఖ్యానించారు.

జీఎఫ్ పీ మద్దతు తీసుకోవాలని బీజేపీ నేత, కేంద్ర మంత్రి నితిన్ గడ్కరీ నిర్ణయించారని, కాంగ్రెస్ నాయకులు ఆ పని చేయలేకపోయారని నిందించారు. ప్రభుత్వాన్ని ఏర్పాటు చేసేందుకు బీజేపీ అక్రమాలకు పాల్పడినట్లు రాణె ఆరోపించారు.

ఇదిలా ఉండగా.. కాంగ్రెస్ పార్టీని ఎవరూ వీడరని, తాను రాణెతో మాట్లాడతానని ఆ పార్టీ ప్రతినిధి కేసీ వేణుగోపాల్ చెప్పారు. 40 స్థానాలున్న గోవాలో కాంగ్రెస్ 17 సీట్లు గెలుచుకుని అతి పెద్ద పార్టీగా అవతరించిన సంగతి తెలిసిందే.

స్వతంత్ర ఎమ్మెల్యే రోహన్ కాంటె కూడా కాంగ్రెస్ కు మద్దతు ప్రకటించారు. గోవాలో అధికార బీజేపీ 13 సీట్లకే పరిమితం కాగా ఇతరులు 10 సీట్లు గెలుచుకున్నారు. అయితే బీజేపీకి చిన్నా చితక పార్టీల ఎమ్మెల్యేలు మద్దతు ఇవ్వడంతో ఆ పార్టీకి ఎమ్మెల్యేల బలం 22కు పెరిగింది. దీంతో ప్రభుత్వ ఏర్పాటు అర్హత రాగా, గోవా సీఎంగా మనోహర్ పారికర్ మంగళవారం ప్రమాణ స్వీకారం చేయనున్నారు.

English summary

With the Bharatiya Janata Party on track to forming the next government in Goa, discontentment may be brewing among Congress leaders from the coastal state. Vishwajit P Rane, the Congress MLA from Valpoi and the leader of opposition in the outgoing Assembly, has announced he is quitting the party. Rane is also the son veteran Congressman and former Goa Chief Minister Pratapsingh Rane. An angry Rane spoke to India Today announcing his exit, slamming the way Congress failed to stitch together a majority in Goa despite emerging as the single-largest party after winning 17 seats.