Bullet Rail: రైల్వే ప్రయాణికులకు శుభవార్త.. 2 గంటల్లోనే హైదరాబాద్ To బెంగళూరు ప్రయాణం.!

భారతదేశంలో బుల్లెట్ రైలు ప్రాజెక్టు అనేది ఒక ప్రతిష్ఠాత్మకమైన ప్రాజెక్టు. దీని ముఖ్య ఉద్దేశం దేశంలోని ప్రధాన నగరాలను హై-స్పీడ్ రైళ్ల ద్వారా అనుసంధానం చేయడం. దీని ద్వారా ప్రయాణ సమయం గణనీయంగా తగ్గిపోతుంది.ప్రస్తుతం భారతదేశపు మొట్టమొదటి బుల్లెట్ రైలు ప్రాజెక్టు ముంబై-అహ్మదాబాద్ కారిడార్ నిర్మాణంలో ఉంది. ఈ ప్రాజెక్టు జపాన్ సాంకేతిక సహకారంతో నిర్మించబడుతోంది. ఈ నేపథ్యంలో, దేశంలోని ప్రధాన నగరాలను అనుసంధానిస్తూ బుల్లెట్ రైలు నెట్వర్క్ ను విస్తరించేందుకు భారతీయ రైల్వే ప్రణాళికలు రూపొందిస్తోంది. ఇందులో భాగంగా, హైదరాబాద్-ముంబై, హైదరాబాద్-బెంగళూరు , హైదరాబాద్-చెన్నై నగరాల మధ్య కొత్త హై-స్పీడ్ రైలు కారిడార్లను నిర్మించాలని నిర్ణయించారు.

హైదరాబాద్-ముంబై హై-స్పీడ్ రైలు కారిడార్

బుల్లెట్ ట్రైన్ నెట్ వర్క్ ల ద్వారా దేశంలోని ప్రధాన నగరాలను అనుసంధానించే బృహత్తర కార్యక్రమంలో భాగంగా హైదరాబాద్-ముంబై హై-స్పీడ్ రైలు కారిడార్ నిర్మించాలని రైల్వే శాఖ నిర్ణయించింది.
ఈ కారిడార్ 709 కిలోమీటర్ల పొడవుతో ముంబై , హైదరాబాద్ నగరాలను కలుపుతుంది. దీనిని బెంగళూరు వరకు పొడిగించే యోచనలో కూడా అధికారులు ఉన్నారు.

హైదరాబాద్-బెంగళూరు హై-స్పీడ్ రైలు కారిడార్

ఈ మార్గం 618 కిలోమీటర్ల దూరం ఉంటుంది. ప్రస్తుతం ఈ రెండు నగరాల మధ్య ప్రయాణించడానికి సాధారణ సూపర్ ఫాస్ట్ ఎక్స్ప్రెస్ రైళ్లలో సుమారు 11 గంటలు, వందే భారత్ ఎక్స్ప్రెస్ లో 8.5 గంటల సమయం పడుతుంది. బుల్లెట్ రైలు రాకతో ఈ ప్రయాణ సమయం కేవలం 2 గంటలకు తగ్గుతుందని భావిస్తున్నారు.

హైదరాబాద్-చెన్నై హై-స్పీడ్ రైలు కారిడార్

ఈ మార్గం 757 కిలోమీటర్లు. ప్రస్తుతం సాధారణ ఎక్స్ప్రెస్ రైళ్లకు 15 గంటలు పట్టే ఈ ప్రయాణం బుల్లెట్ రైలుతో కేవలం 2.5 గంటలకు తగ్గుతుంది. ఈ మూడు మార్గాలలో ఎలివేటెడ్ మరియు అండర్ గ్రౌండ్ ట్రాక్ ల కలయికతో రైల్వే లైన్లను నిర్మించాలని యోచిస్తున్నారు. ఈ ప్రాజెక్టులు పూర్తి కావడానికి 10 నుండి 13 సంవత్సరాలు పట్టవచ్చని రైల్వే అధికారులు అంచనా వేస్తున్నారు. బుల్లెట్ రైలు రాకతో ప్రయాణ సమయం గణనీయంగా తగ్గడంతో పాటు, ఆర్థికాభివృద్ధికి కూడా తోడ్పడుతుంది.

English summary

Good news for railway passengers Travel from Hyderabad to Bangalore in 2 hours by bullet train!