ఆర్జీకార్, లా స్టూడెంట్, ఇప్పుడు ఐఐఎం.. "అత్యాచారాలకు కేరాఫ్" కోల్‌కతా విద్యాలయాలు?

Kolkata: కోల్‌కతాలో మరో అత్యాచార ఘటన వెలుగులోకి వచ్చింది. కోల్‌కతాలోని విద్యాలయాలు అత్యాచారాలకు కేరాఫ్‌గా మారుతున్నాయి. ఆర్జీకార్ మెడికల్ కళాశాలలో మెడికో హత్యాచారం, కోల్‌కతా లా కాలేజీలో విద్యార్థిపై సామూహిక అత్యాచారం ఘటనలు మరువక ముందే.. ఇండియన్ ఇన్‌స్టిట్యూట్ ఆఫ్ మేనేజ్‌మెంట్(IIM)-కలకత్తాలో మరో అత్యాచార ఘటన వెలుగులోకి వచ్చింది. ఐఐఎంలో చదువుతున్న విద్యార్థినిపై క్యాంపస్ హాస్టల్‌లో మరో విద్యార్థి అత్యాచారానికి పాల్పడినట్లు పోలీసులు శనివారం వెల్లడించారు. హరిదేవ్ పూర్ పోలీస్ స్టేషన్‌లో విద్యార్థిని ఫిర్యాదుతో కేసు నమోదు చేసి నిందితుడిని అరెస్ట్ చేసినట్లు పోలీసులు తెలిపారు.
‌
ఐఐఎం-కలకత్తా బాలుర హాస్టల్‌లో శుక్రవారం జరిగినట్లు పోలీసులు పేర్కొన్నారు. విద్యార్థిని ఫిర్యాదు ప్రకారం.. కౌన్సెలింగ్ సెషన్ పేరుతో ఆమెను హాస్టల్‌కు పిలిపించినట్లు తెలిసింది. నిందితుడు ఇచ్చిన మత్తుమందు కలిపిన పానీయం సేవించిన తర్వాత తాను స్పృహ కోల్పోయినట్లు ఆమె ఫిర్యాదులో పేర్కొంది. స్పృహలోకి వచ్చిన తర్వాత తనపై అత్యాచారం జరిగినట్లు గ్రహించానని ఆ యువతి వెల్లడించింది. దీని గురించి ఎవరికైనా చెబితే తీవ్ర పరిణామాలు ఉంటాయని నిందితుడు బెదిరించినట్లు ఆమె పోలీసులకు తెలియజేసింది. ఈ కేసు నమోదు చేసిన కొన్ని గంటల్లోనే నిందితుడిని అరెస్ట్ చేశామని.. ప్రస్తుతం దర్యాప్తు జరుగుతోందని పోలీసులు వెల్లడించారు.

కోల్‌కతాలోని ఆర్జీకర్ మెడికల్ కాలేజీలో జూనియర్ వైద్యురాలి హత్యాచార ఘటన దేశంలోని ప్రజలను కన్నీళ్లు పెట్టించిన సంగతి తెలిసిందే. ఆ ఘటన అనంతరం దక్షిణ కోల్‌కతాలోని కస్బాలోని ఒక లా కళాశాలలో న్యాయ విద్యార్థినిపై సామూహిక అత్యాచారం జరిగింది. విద్యార్థినిపై కళాశాల ప్రాంగణంలోనే నిందితులు అత్యంత పాశవికంగా అత్యాచారానికి పాల్పడ్డారు. ఈ ఘటనకు సంబంధించి ముగ్గురు నిందితులను పోలీసులు అరెస్ట్ చేశారు. మొన్న ఆర్జీకార్ మెడికో..నిన్న లా స్టూడెంట్..నేడు ఐఐఎం విద్యార్థిని.. ఇలా కోల్‌కతా విద్యాలయాలు అత్యాచారాలకు కేరాఫ్‌గా మారుతున్నాయని పలువురు ఆగ్రహం వ్యక్తం చేస్తున్నారు. ఈ క్రమంలో పశ్చిమ బెంగాల్లో మహిళల భద్రత మీద రచ్చ రాజుకుంది.

English summary

Another rape incident at IIM-Calcutta's boys' hostel adds to a disturbing trend in Kolkata's educational institutions, following recent cases at RG Kar Medical College and a Law College.