టాప్ 5లో భారత్: సైనిక శక్తిలో ప్రభంజనం!

ప్రపంచవ్యాప్తంగా యుద్ధ మేఘాలు కమ్ముకుంటున్న వేళ.. దేశ భద్రత విషయంలో రాజీపడకూడదని భారత్ నిశ్చయించుకుంది. తన సైనిక సామర్థ్యాన్ని ఆధునీకరించుకుంటూ, రక్షణ రంగంలో సరికొత్త రికార్డులను సృష్టిస్తోంది. తాజాగా స్టాక్‌హోమ్ ఇంటర్నేషనల్ పీస్ రీసెర్చ్ ఇన్‌స్టిట్యూట్ (SIPRI) విడుదల చేసిన గణాంకాలు భారతదేశ పెరుగుతున్న సైనిక ప్రాబల్యాన్ని చాటిచెబుతున్నాయి.

భారతదేశం తన రక్షణ రంగాన్ని బలోపేతం చేసే దిశగా భారీ అడుగులు వేస్తోంది. SIPRI నివేదిక ప్రకారం, 2025లో భారత్ తన సైనిక వ్యయాన్ని 8.9 శాతం పెంచుకుంది. దీంతో మొత్తం $92.1 బిలియన్ల (సుమారు రూ.7.7 లక్షల కోట్లు) ఖర్చుతో ప్రపంచంలోనే ఐదవ అతిపెద్ద సైనిక వ్యయం చేసే దేశంగా భారత్ అవతరించింది. చైనా, అమెరికా వంటి అగ్రరాజ్యాల మధ్య భారత్ తన స్థానాన్ని సుస్థిరం చేసుకోవడం దేశ రక్షణ సన్నద్ధతకు నిదర్శనం.

మే 2025 ఘర్షణలు.. పెరిగిన అప్రమత్తత..

2025 మే నెలలో భారత్-పాకిస్తాన్ సరిహద్దుల్లో తలెత్తిన ఉద్రిక్తతలు ప్రాంతీయ సైనిక వ్యయం పెరగడానికి ప్రధాన కారణంగా నిలిచాయి. యుద్ధ విమానాలు, ఆధునిక డ్రోన్లు, క్షిపణి వ్యవస్థల కొనుగోలుపై భారత్ ప్రత్యేక దృష్టి సారించింది. ఇదే సమయంలో పొరుగు దేశమైన పాకిస్తాన్ కూడా తన వ్యయాన్ని 11 శాతం పెంచి $11.9 బిలియన్లకు చేర్చింది. చైనా నుండి కొత్త యుద్ధ విమానాలు, క్షిపణుల ఆర్డర్లు, పాత బకాయిల చెల్లింపుల వల్ల పాకిస్తాన్ ఖర్చు పెరిగినట్లు నివేదిక స్పష్టం చేసింది.

ప్రపంచ సైనిక వ్యయంలో పెను మార్పులు

ప్రపంచవ్యాప్తంగా రక్షణ వ్యయం వరుసగా 11వ సంవత్సరం కూడా వృద్ధి చెంది రికార్డు స్థాయిలో $2.89 ట్రిలియన్లకు చేరింది.

• అగ్రస్థానంలో అమెరికా: ఉక్రెయిన్‌కు సహాయం తగ్గడంతో అమెరికా వ్యయం 7.5 శాతం తగ్గి $954 బిలియన్లకు చేరినప్పటికీ, అది ఇప్పటికీ ప్రపంచంలోనే అత్యధికం.
• రెండో స్థానంలో చైనా: వరుసగా 31వ సంవత్సరం కూడా చైనా తన బడ్జెట్‌ను పెంచుకుంటూ $336 బిలియన్లకు చేర్చింది.
• మూడో స్థానంలో రష్యా: ఉక్రెయిన్‌తో యుద్ధం చేస్తున్న రష్యా రక్షణ వ్యయం కోసం $190 బిలియన్లను కేటాయించింది.
• నాలుగో స్థానంలో జర్మనీ: జర్మనీ తన సైనిక వ్యయాన్ని 24 శాతం మేర భారీగా పెంచింది. తద్వారా దాని రక్షణ వ్యయం $ 114 బిలియన్లకు చేరింది

ప్రతి వ్యక్తిపై రక్షణ భారం

ప్రపంచ దేశాలన్నీ తమ బడ్జెట్‌లో సగటున 6.9 శాతం సైన్యానికే కేటాయిస్తున్నాయి. అంటే ప్రపంచంలో ఉన్న ప్రతి వ్యక్తి రక్షణ కోసం సగటున $352 ఖర్చవుతోంది. ప్రపంచ దేశాల మొత్తం జీడీపీలో 2.5 శాతం కేవలం రక్షణ కోసమే వినియోగిస్తున్నారు. 2009 తర్వాత ఈ స్థాయిలో సైనిక భారం పెరగడం ఇదే మొదటిసారి.

పాక్‌ 31వ స్థానంలో..

దేశ భద్రత విషయంలో పాకిస్థాన్ 31వ స్థానంలో నిలిచింది. పాక్ తన సైనిక వ్యయాన్ని 11 శాతం పెంచి 11.9 బిలియన్‌ డాలర్లకు చేర్చింది. పాక్‌తో పోలిస్తే భారత సైనిక వ్యయం దాదాపు 9 రెట్లు అధికం.

భవిష్యత్తు అంచనాలు

గాజా యుద్ధం ముగియడంతో ఇజ్రాయెల్ వ్యయం 4.9 శాతం తగ్గగా, ఇరాన్ ఖర్చు కూడా వరుసగా రెండో ఏడాది క్షీణించింది. అయితే, 2026 సంవత్సరానికి అమెరికా నిధులు ఇప్పటికే $1 ట్రిలియన్‌ను దాటేశాయి. దీన్ని బట్టి చూస్తుంటే ప్రపంచవ్యాప్తంగా ఈ ఆయుధ పోటీ మరియు సైనిక వ్యయ ధోరణి 2026లో కూడా కొనసాగే అవకాశం ఉందని SIPRI విశ్లేషకులు అంచనా వేస్తున్నారు.

English summary

India ranks 5th in global military spending with $92.1 billion in 2025. Following the May 2025 India-Pakistan conflict, India increased its defense budget by 8.9% according to the latest SIPRI report.