అరుణాచలంలో కార్తీక దీపోత్సవ శోభ. సింహ వాహనంపై ఊరేగిన గ్రామదేవత
తలచుకున్నంత మాత్రానే ముక్తిని ప్రసాదించే పంచభూత క్షేత్రాల్లో అగ్ని స్థలమైన తిరువణ్ణామలై అరుణాచలేశ్వర స్వామి ఆలయంలో పండుగ వాతావరణం నెలకొంది. ఎంతో వైభవంగా నిర్వహించే వార్షిక తిరుకార్తీక దీపోత్సవాలకు ఆలయం సర్వాంగ సుందరంగా ముస్తాబైంది. ఈ నెల 15న ధ్వజారోహణంతో పది రోజుల పాటు సాగే ఈ మహా ఉత్సవాలకు అంకురార్పణ జరగనుండగా, శుక్రవారం ఆలయ క్షేత్రపాలకురాలు పిడారి అమ్మన్ ఉత్సవాన్ని భక్తులు అత్యంత భక్తిశ్రద్ధలతో జరుపుకున్నారు.
ఆలయ మూడో ప్రాకారంలో కొలువై ఉన్న గ్రామదేవత పిడారి అమ్మవారికి ఉదయం నుంచే అర్చకులు ప్రత్యేక అభిషేకాలు, శాస్త్రోక్త పూజలు నిర్వహించారు. రంగురంగుల సుగంధ పుష్పాలతో అమ్మవారి ఉత్సవ విగ్రహాన్ని ఎంతో మనోహరంగా అలంకరించారు. అనంతరం ఆలయ సిబ్బంది అమ్మవారిని భుజాలపై మోసుకుంటూ మూడో ప్రాకారంలోని మూలవిరాట్టు సన్నిధికి తీసుకువెళ్లి అక్కడ ప్రత్యేక దీపారాధన చేశారు.
సింహ వాహనంపై రాజగోపురం వద్ద భక్తులకు దర్శనం
ప్రత్యేక పూజల అనంతరం పిడారి అమ్మవారిని ఊరేగింపుగా ఆలయ రాజగోపురం సమీపంలోని పదహారు కాళ్ల మండపానికి తీసుకువచ్చారు. అక్కడ శాస్త్రోక్తంగా సింహ వాహనంపై అమ్మవారిని అధిష్టింపజేశారు. సింహ వాహనంపై కొలువుదీరిన అమ్మవారి దివ్య రూపాన్ని దర్శించుకునేందుకు భక్తులు భారీ సంఖ్యలో మండపం వద్దకు తరలివచ్చి మొక్కులు చెల్లించుకున్నారు.
మాడవీధుల్లో కన్నులపండువగా అమ్మవారి ఊరేగింపు
మండపంలో పూజలు ముగిసిన తర్వాత, సింహ వాహనంపై ఆసీనురాలైన పిడారి అమ్మవారు ఆలయ మాడవీధుల్లో ఊరేగుతూ భక్తులకు దర్శనమిచ్చారు. మంగళవాయిద్యాలు, భక్తుల జయజయధ్వానాల మధ్య సాగిన ఈ శోభాయాత్ర ఆద్యంతం కన్నులపండువగా జరిగింది. మాడవీధుల వెంబడి పెద్ద ఎత్తున చేరుకున్న స్థానికులు, యాత్రికులు అమ్మవారికి హారతులు ఇచ్చి ఆశీస్సులు పొందారు.
Click it and Unblock the Notifications
Sign in with Google
