సిగరెట్ తాగొద్దన్నందుకు.. ప్యాంట్ జిప్ విప్పి..

ఢిల్లీ : సౌదీ ఎయిర్‌లైన్స్‌కు చెందిన విమానంలో ఓ యువకుడు రచ్చ చేశాడు. విమానంలో సిగరెట్ తాగొద్దన్నందుకు రెచ్చిపోయాడు. ఫ్లైట్‌లో మహిళా సిబ్బందితో అసభ్యంగా ప్రవర్తించాడు. కేసు బుక్ కావడంతో చివరకు కటకటాల పాలయ్యాడు.

కొట్టాయంకు చెందిన అబ్దుల్ షహీద్ శంషుద్దీన్ సౌదీ ఎయిర్‌లైన్స్ ఫ్లైట్ జెడ్డా నుంచి ఢిల్లీకి బయలుదేరాడు. ఫ్లైట్ టేకాఫ్ అయిన కాసేపటికి అతను విమానంలో సిగరెట్ వెలిగించేందుకు ప్రయత్నించాడు. అది గమనించిన ఫ్లైట్ అటెండెంట్ అతన్ని వారించింది. ఫ్లైట్‌లో సిగరెట్ తాగకూడదని చెప్పింది. దీంతో రెచ్చిపోయిన శంషుద్ధీన్ రచ్చ చేశాడు. తొలుత ఆమెతో వాగ్వాదానికి దిగి ఆ తర్వాత బండ బూతులు తిట్టాడు.

శంషుద్ధీన్‌కు సర్దిచెప్పే ప్రయత్నం చేసినా సదరు మహిళ పరిస్థితి చేయిదాటిపోతుండటంతో ఇతర సిబ్బందిని సాయం కోసం పిలిచింది. దీంతో మరింత రెచ్చిపోయిన యువకుడు ప్యాంట్ జిప్ తెరిచి అసభ్యంగా సంజ్ఞలు చేశాడు. విమానం ఢిల్లీలో ల్యాండైన వెంటనే క్యాబిన్ క్రూ సిబ్బంది ఎయిర్‌పోర్ట్ ఆపరేషన్స్ కంట్రోల్ సెంటర్‌కు సమాచారం అందజేశారు. దీంతో శంషుద్దీన్‌ను అదుపులోకి తీసుకున్న సీఐఎస్ఎఫ్ అధికారులు అతన్ని ఢిల్లీ పోలీసులకు అప్పగించారు. వివిధ సెక్షన్ల కింద కేసు నమోదుచేసిన పోలీసులు నిందితున్ని కటకటాలవెనక్కి నెట్టారు.

English summary

A man from Kerala on board a Saudi Airlines flight from Jeddah to New Delhi unzipped his pants on being stopped by a lady cabin staff from lighting a cigarette. The man has been identified as Abdul Shahid Shamsudeen, a resident of Kottayam in Kerala.