10 నెలల చిన్నారి.. నలుగురికి పునర్జన్మ!
మనిషి పుట్టుక నుంచి చావు దాకా ప్రతీ విషయంలోనూ ఏదో ఒక పరమార్థం దాగే ఉంటుంది అంటారు పెద్దలు. కొంతమంది సమాజం కోసం తమ జీవితాన్ని త్యాగం చేస్తే.. మరికొంత మంది తాము చనిపోయినా అవయవదానంతో నలుగురికి పునర్జన్మ కలిగించే గొప్ప భాగ్యం పొందుతారు. కారణజన్ములుగా కీర్తింపబడుతూ ఎంతో మంది తల్లులకు కడుపుకోత తీర్చే దేవతామూర్తులుగా నిలుస్తారు. ఈ చిన్నారి కూడా ఆ కోవకే చెందుతుంది. తల్లి ఒడిలో ఆడుకోవాల్సిన వయసు.. లోకాన్ని చూడకముందే నూరేళ్లు నిండిపోయాయి. కానీ ఆ పసికందు ప్రాణం పోతూ పోతూ మరో నలుగురి జీవితాల్లో వెలుగులు నింపింది. కేరళలోని పతనంతిట్ట జిల్లాకు చెందిన 10 నెలల చిన్నారి ఆలిన్ షెరిన్ అబ్రహం.. రాష్ట్రంలోనే అతి పిన్న వయస్కురాలైన అవయవ దాతగా నిలిచి, మరణంలోనూ అమరత్వాన్ని చాటుకుంది.
ప్రాణాన్ని తీసిన ప్రమాదం
మల్లపల్లికి చెందిన ఆలిన్ షెరిన్ ఓ రోడ్డు ప్రమాదంలో తీవ్రంగా గాయపడింది. ప్రాణాలతో పోరాడుతున్న ఆ చిన్నారిని కాపాడాలని వైద్యులు శతవిధాలా ప్రయత్నించారు. కానీ విధి వెక్కిరించింది. చిన్నారి బ్రెయిన్ డెడ్ అయిందని వైద్యులు ధృవీకరించారు. కళ్ల ముందే కన్నబిడ్డ విగతజీవిగా పడి ఉండటం చూసి ఆ తల్లిదండ్రులు తట్టుకోలేకపోయారు. పుట్టెడు దుఃఖంలో ఉన్నప్పటికీ.. తమ బిడ్డ మరొకరి రూపంలో బతికి ఉండాలని వారు తీసుకున్న నిర్ణయం అందరినీ కన్నీరు పెట్టించింది.
నాలుగు నిండు ప్రాణాలకు ఊపిరి
ఆలిన్ తల్లిదండ్రుల అంగీకారంతో కేరళ ఆరోగ్య శాఖ అవయవాల తరలింపుకు వెంటనే ఏర్పాట్లు చేసింది. ఆ చిన్నారి దానం చేసిన అవయవాలు నలుగురు చిన్నారులకు కొత్త జీవితాన్ని ప్రసాదించాయి. తిరువనంతపురం మెడికల్ కాలేజీలో చికిత్స పొందుతున్న ఓ 10 ఏళ్ల బాలుడికి ఆలిన్ రెండు కిడ్నీలను అమర్చనున్నారు. కిమ్స్ ఆసుపత్రిలో మృత్యువుతో పోరాడుతున్న 6 నెలల పసికందుకి కాలేయాన్ని దానం చేశారు. ఆస్టర్ మెడ్సిటీలో చికిత్స పొందుతున్న మరో చిన్నారికి గుండె వాల్వ్ అందించారు. అమృత ఆసుపత్రిలోని అంధులైన చిన్నారులకు చూపునిచ్చేందుకు కళ్లను దానం చేశారు.
ఆరోగ్య మంత్రి భావోద్వేగ నివాళి
ఈ ఘటనపై కేరళ ఆరోగ్య మంత్రి వీణా జార్జ్ సోషల్ మీడియా వేదికగా స్పందిస్తూ తీవ్ర ఆవేదన వ్యక్తం చేశారు. "ఊహించని నష్టాన్ని ఎదుర్కొంటున్నప్పటికీ, మరో నలుగురి ప్రాణాలను కాపాడాలని ఆ తల్లిదండ్రులు తీసుకున్న నిర్ణయం అత్యంత సాహసోపేతమైనది, నిస్వార్థమైనది" అని ఆమె కొనియాడారు. చిన్నారి అవయవాలను అమృత ఆసుపత్రి నుంచి తిరువనంతపురానికి గ్రీన్ ఛానల్ ద్వారా అత్యంత వేగంగా తరలించారు. తమ బిడ్డ ఇక లేదనే నిజాన్ని జీర్ణించుకోలేకపోయినా.. తమ పాప అవయవాలు ఇతరుల రూపంలో ఈ ప్రపంచంలో ఉంటాయనే ఆలోచన ఆ తల్లిదండ్రులకు కొంత ఊరటనిస్తోంది. ఆలిన్ షెరిన్ చేసిన ఈ త్యాగం అవయవ దానంపై ప్రజల్లో మరింత అవగాహన కల్పిస్తుందని అందరూ ఆశిస్తున్నారు.
Click it and Unblock the Notifications
Sign in with Google