సాఫ్ట్‌వేర్ ఇంజనీర్ కంటే ఎక్కువే.. ఈ ఇస్త్రీ లెక్కలు చూస్తే షాకవ్వాల్సిందే!

నేటి కాలంలో చదువు, డిగ్రీలు, ఏసీ గదుల్లో కూర్చుని చేసే సాఫ్ట్‌వేర్ ఉద్యోగాలకే సమాజంలో గౌరవం, భారీ జీతాలు ఉంటాయని అందరూ భావిస్తారు. నెలకు లక్షల్లో సంపాదించాలంటే పెద్ద కార్పొరేట్ సంస్థలో మేనేజర్ స్థాయిలో ఉండాలని చాలా మంది నమ్మకం. కానీ కష్టపడే తత్వం, సరైన వ్యాపార దృక్పథం ఉంటే చిన్నపాటి స్వయం ఉపాధి కూడా ఐటీ ఉద్యోగుల కంటే మెరుగైన ఆదాయాన్ని తెచ్చిపెడుతుందని ఓ సాధారణ లాండ్రీ షాపు యజమాని నిరూపిస్తున్నారు. ప్రస్తుతం సోషల్ మీడియాలో వైరల్ అవుతున్న ఓ పోస్ట్ ఈ వాస్తవాలను కళ్లకు కట్టినట్లు చూపిస్తోంది.

వైరల్ అవుతున్న సోషల్ మీడియా పోస్ట్
ఈ ఆసక్తికరమైన ఉదంతాన్ని నళిని ఉనగర్ అనే మహిళ ఎక్స్ (ట్విట్టర్) వేదికగా పంచుకున్నారు. తన ఇంటి సమీపంలో రెగ్యులర్‌గా వెళ్లే ఒక లోకల్ డ్రై క్లీనింగ్ షాపు యజమానితో ఆమె జరిపిన సంభాషణలో ఈ ఆశ్చర్యకరమైన విషయాలు వెలుగులోకి వచ్చాయి. ఆ షాపును ఇద్దరు భార్యాభర్తలు కలిసి నడుపుతున్నారు. వారికి సహాయంగా ఇద్దరు వర్కర్లు కూడా ఉన్నారు. వారి సంపాదన వివరాలు విన్న నళిని ఒక్కసారిగా షాక్‌కు గురయ్యారు. ఒక సామాన్యమైన లాండ్రీ షాపు ద్వారా నెలకు రూ. 2 లక్షలకు పైగా నికర లాభం వస్తుందని ఆమె అస్సలు ఊహించలేదు.

ఆదాయం లెక్కలు చూస్తే షాక్ అవ్వాల్సిందే!
వారి రోజువారీ పనితీరును గమనిస్తే ఈ ఆదాయం ఎలా సాధ్యమో అర్థమవుతుంది. వారు ప్రతిరోజూ సుమారు 350 బట్టలను ఇస్త్రీ చేస్తారు. ఒక్కో బట్టకు కేవలం రూ. 10 వసూలు చేసినా, దీని ద్వారా రోజుకు రూ. 3,500 వస్తుంది. దీనికి తోడు రోజుకు సుమారు 20 భారీ దుస్తులను (పట్టు చీరలు, సూట్లు వంటివి) డ్రై క్లీన్ చేస్తారు. ఒక్కో డ్రై క్లీనింగ్‌కు రూ. 350 చొప్పున దీని ద్వారా రోజుకు రూ. 7,000 ఆదాయం లభిస్తుంది. అంటే మొత్తంగా రోజువారీ ఆదాయం రూ. 10,500 వరకు ఉంటుంది. నెలకు కేవలం మూడు రోజులు మాత్రమే సెలవు తీసుకుంటూ పనిచేస్తే.. వారి నెలవారీ మొత్తం రెవెన్యూ రూ. 2,83,500 కు చేరుకుంటుంది.

Yesterday, I was talking with the dry cleaning shop owner near my house, where I regularly go. He and his wife both work together, and they have two helpers on salary. I was shocked when they said they earn around ₹2,00,000 per month, which is equal to a 10+ years experienced… pic.twitter.com/BjPddpb9Me

— Nalini Unagar (@NalinisKitchen) February 9, 2026

ఖర్చులు పోను భారీ లాభం
ఏ వ్యాపారానికైనా మెయింటెనెన్స్ ఖర్చులు ఉంటాయి. ఈ లాండ్రీ షాపు విషయంలో విద్యుత్ బిల్లు సుమారు రూ. 6,000 అలాగే ఇద్దరు సహాయకుల జీతాల కోసం రూ. 40,000 ఖర్చవుతుంది. ఈ ఖర్చులన్నీ తీసివేసినా ఆ దంపతులకు నెలకు దాదాపు రూ. 2,37,500 నికర లాభం మిగులుతోంది. "భారతదేశంలో 10 సంవత్సరాల అనుభవం ఉన్న ఒక సీనియర్ సాఫ్ట్‌వేర్ ఇంజనీర్ పొందే జీతం కంటే ఇది ఎక్కువ" అని నళిని తన పోస్ట్‌లో పేర్కొన్నారు. ఎటువంటి కార్పొరేట్ ఒత్తిళ్లు లేకుండా, సొంతంగా కష్టపడుతూ ఇంతటి భారీ ఆదాయాన్ని గడించడం విశేషం.

డిగ్రీల కంటే నైపుణ్యమే ముఖ్యం!
ఈ పోస్ట్ నెటిజన్ల మధ్య పెద్ద చర్చకు దారితీసింది. మనం కేవలం వైట్ కాలర్ ఉద్యోగాల కోసమే పాకులాడుతున్నామని.. కానీ క్షేత్రస్థాయిలో డిమాండ్ ఉన్న పనులను నైపుణ్యంతో చేస్తే ఆర్థికంగా గొప్పగా స్థిరపడవచ్చని నెటిజన్లు అభిప్రాయపడుతున్నారు. అమెరికా వంటి అభివృద్ధి చెందిన దేశాల్లో ఇటువంటి చిన్న తరహా వ్యాపారాలే ఆర్థిక వ్యవస్థకు వెన్నెముక అని కొందరు గుర్తు చేస్తున్నారు. ఏ పనీ చిన్నది కాదని, అంకితభావంతో చేస్తే విజయం వరిస్తుందని ఈ లాండ్రీ షాపు యజమాని కథనం నిరూపిస్తోంది.

English summary

Laundry Shop Owner Earnings, A viral X post by Nalini Unagar reveals how a local laundry shop owner in India earns over Rs 2.3 lakh monthly profit, surpassing the salary of senior software engineers.