రథయాత్ర అంటే ఆమెకు భయం...ప్రజాస్వామ్యాన్ని ఖూనీ చేస్తున్నారు: అమిత్ షా

కోల్ కతా: వెస్ట్ బెంగాల్ ముఖ్యమంత్రి మమత బెనర్జీ పై నిప్పులు చెరిగారు బీజేపీ జాతీయాధ్యక్షుడు అమిత్ షా. వెస్ట్ బెంగాల్‌లో బీజేపీ రథ యాత్రకు అనుమతి నిరాకరించడంతో ఆమెపై ఆగ్రహం వ్యక్తం చేశారు కమలదళాధిపతి అమిత్ షా. మమతా బెనర్జీ రాష్ట్రంలో ప్రజాస్వామ్యాన్ని ఖూనీ చేస్తున్నారని మండిపడ్డారు. బీజేపీ స్టేచర్ రాష్ట్రంలో పెరిగిపోతుండటంతో ఆమెకు భయం పట్టుకుందని అన్నారు అమిత్ షా.

బెంగాల్‌లో రథ యాత్ర నిర్వహించరాదంటూ అందుకు నిరాకరిస్తూ మమత సర్కార్ ఆదేశాలు జారీ చేసింది. ఆదేశాలను సవాల్ చేస్తూ బీజేపీ కోర్టును ఆశ్రయించింది. అయితే ప్రభుత్వ నిర్ణయాన్నే కోర్టు సమర్థించింది. రథ యాత్ర నిర్వహిస్తే శాంతి భద్రతలకు విఘాతం ఏర్పడే అవకాశం ఉందని కోర్టు అభిప్రాయపడింది. ఇదిలా ఉంటే రాష్ట్రంలో మూడు చోట్ల రథయాత్రకు ప్లాన్ చేసింది కమలం పార్టీ. ఇందులో కూచ్ బెహార్‌తో పాటు ప్రధాన పార్లమెంటరీ స్థానాలను రథయాత్రను కవర్ చేయాలని కమలనాథులు భావించారు. ఈ రథయాత్ర ద్వారా రాష్ట్రంలో బీజేపీని బలోపేతం చేసి 2019 లోక్‌సభ ఎన్నికల్లో గట్టి పోటీని ఇవ్వాలని భావించారు కమలనాథులు.

రాష్ట్రంలో రథయాత్రలు నిర్వహించరాదని కోర్టు తెలపడంతో నిరాశలోకి వెళ్లిపోయాయి బీజేపీ శ్రేణులు. 2014 నుంచి తాను బెంగాల్‌లో 23 సార్లు వచ్చానని.. ఎక్కడా మతఘర్షణలు చోటుచేసుకోలేదని చెప్పారు. తాము వెళ్లిపోయాక జరిగిన అల్లర్లకు సంబంధం లేదని అది పోలీసులు తృణమూల్ కాంగ్రెస్ మధ్య జరిగిన అల్లర్లని అన్నారు.

దీనికి సంబంధించిన అన్ని రికార్డులు హైకోర్టు ముందుంచుతామన్నారు అమిత్ షా. మతఘర్షణలు జరుగుతాయని ముందే ఎలా చెబుతారని ఆయన ప్రశ్నించారు. రథ యాత్రను ఆపితే ఆమెకు ఎలాంటి లాభం చేకూరకపోగా... ప్రజల ఆగ్రహాన్ని ఎదుర్కోవాల్సి వస్తుందని షా అన్నారు. మమతా బెనర్జీ బీజేపీకి ప్రతి విషయంలో అడ్డు తగులుతున్నారని ఇదంతా ప్రజలు గమనిస్తున్నారని చెబుతోంది బీజేపీ. ఆమెకు ప్రజలే గట్టిగా బుద్ధి చెబుతారని వెల్లడించింది.

English summary

BJP president Amit Shah on Friday launched a sharp attack on the Chief Minister Mamata Banerjee, starting with her government’s refusal to permit his party to take out a rally in the state and later widening the criticism to cover what he claimed, was the state’s dismal governance record.“Mamata Banerjee is strangling democracy in the state.... she is scared,” he said hours after the BJP challenged the court order that refused to allow the party to launch its much-publicised rally that was to be flagged off by BJP chief Amit Shah.