వేడుక-విషాదం: ఫూటుగా తాగి బీరు బాటిల్‌తో తలపై కొట్టుకున్నాడు, మృతి

ఫూటుగా మద్యం సేవించిన ఓ యువకుడు.. మద్యం మత్తులో బీరు బాటిల్‌తో తన తలపైనే బలంగా కొట్టుకున్నాడు. దీంతో తీవ్ర రక్తస్రావమై ప్రాణాలు వదిలాడు.

న్యూఢిల్లీ: కొత్త సంవత్సరం వేడుకల్లో పలుచోట అపశృతులు చోటు చేసుకున్నాయి. వేడుకల్లో భాగంగా ఫూటుగా మద్యం సేవించిన ఓ యువకుడు.. మద్యం మత్తులో బీరు బాటిల్‌తో తన తలపైనే బలంగా కొట్టుకున్నాడు. దీంతో తీవ్ర రక్తస్రావమై ప్రాణాలు వదిలాడు. ఈ విషాద ఘటన న్యూఢిల్లీలో చోటు చేసుకుంది.

వివరాల్లోకి వెళితే.. లూథియానాకు చెందిన దీపక్ టాండన్ అనే చిన్న వ్యాపారి కొత్తసంవత్సర వేడుకల్లో పాల్గొనేందుకు తన ఇద్దరు స్నేహితులతో కలిసి న్యూఢిల్లీలోని హాజ్ ఖాస్ గ్రామంలో బార్‌కు వచ్చాడు. ఉత్సవాల్లో మునిగితేలుతూ దీపక్ టాండన్ పీకల దాకా మద్యం తాగాడు.

ఆ తర్వాత మద్యం మత్తులో తనకు నచ్చిన పాట పెట్టాలని నిర్వాహకులను డిమాండ్ చేశాడు. కాగా, మరికొందరు విభేదించడంతో పాట ఎంపిక విషయంలో వారితో గొడవపడ్డాడు. ఈ క్రమంలో దీపక్ ఆగ్రహంతో ఖాళీ బీరు బాటిల్‌ను తన తలపైనే బలంగా పగలగొట్టుకున్నాడు.

దీంతో అతని తలకు తీవ్రగాయాలై రక్తస్రావమైంది. వెంటనే దీపక్‌ను పోలీసులు సఫ్ధర్ జంగ్ ఆసుపత్రికి తరలించారు. చికిత్స పొందుతూ ఆస్పత్రిలోనే దీపక్ ప్రాణాలు విడిచాడు. ఘటనపై పోలీసులు కేసు నమోదు చేసి దర్యాప్తు చేస్తున్నారు.

English summary

A 30-year-old businessman died after he allegedly smashed a beer bottle on his head following a pub brawl in south Delhi's Hauz Khas area on New Year's Eve.