సోనియాను ఆదర్శంగా తీసుకోండి: అవినీతిపై మేనకా
న్యూఢిల్లీ: కాంగ్రెస్ పార్టీ జాతీయ అధ్యక్షురాలు సోనియా గాంధీపై ఆమె తోడికోడలు, దివంగత సంజయ్ గాంధీ సతీమణి, కేంద్రమంత్రి మేనకా గాంధీ ప్రశంసల వర్షం కురిపించారు. అవినీతిని అరికట్టడంలో, బంధుప్రీతికి అడ్డుకట్ట వేయడంలో సోనియా ఆదర్శప్రాయురాలని మేనకా గాంధీ అన్నారు.
తన నియోజకవర్షం పిలిభిత్లో జరిగిన ఓ కార్యక్రమంలో పాల్గొన్న కేంద్ర మహిళా, శిశు సంక్షేమ శాఖ మంత్రి మేనకా గాంధీ మాట్లాడుతూ.. గతంలో సోనియాగాంధీ బంధువు ఒకరు ఓ షాపును ప్రారంభించి, ఆమె పేరును వాడుకుని లబ్ది పడాలని చూస్తే, దాన్ని ఆమె అడ్డుకున్నారని గుర్తు చేశారు.
ఆ వ్యక్తికి ఎలాంటి సాయమూ చేయవద్దని దినపత్రికల్లో ప్రకటనలు ఇచ్చారని, ప్రతి రాజకీయ నేతా అదే విధంగా బంధుప్రీతికి దూరంగా ఉండాలని మేనకా గాంధీ కోరారు.
ఇక అవకాశం దొరికినప్పుడెల్లా సోనియాపై విమర్శలు గుప్పిస్తుండే.. మేనకాగాంధీ, ఇలా పొగడ్తలతో ముంచెత్తడం రాజకీయ ప్రాధాన్యం సంతరించుకుంది. కాగా, ప్రభుత్వ కార్యాలయాల్లో అవినీతి చోటు చేసుకోకుండా సీసీ టీవీలు ఏర్పాటు చేయాలని అధికారులకు సూచించారు.