స్టాలిన్ నన్ను కిడ్నాప్ చేయలేదు: ఏళ్ల తర్వాత చెప్పిన నాటి న్యూస్ రీడర్ ఫాతిమా
చెన్నై: కొన్నేళ్ల కిందట దూరదర్శన్ తమిళ ఛానళ్లో న్యూస్ రీడర్గా పని చేసిన ఫాతిమా బాబును డీఎంకే చీఫ్ స్టాలిన్ కిడ్నాప్ చేసినట్లుగా ప్రచారం ఉంది. దీనిపై ఫాతిమా తాజాగా స్పందించారు. ఓ ఇంటర్వ్యూలో ఆమె మాట్లాడారు. అప్పుడు ఏం జరిగిందో ఆమె వెల్లడించారు.
స్టాలిన్ తనను అపహరించినట్లుగా వచ్చిన వదంతులతో తాను ఆశ్చర్యపోయానని, ఈ విషయమై ఓ వార పత్రిక విలేకరికి తాను వివరణ ఇచ్చినప్పటికీ ప్రచురితం కాలేదని పేర్కొన్నారు. దూరదర్శన్లో తాను న్యూస్ రీడర్గా పని చేస్తున్న సమయంలోనే సీరియల్లో నటించే అవకాశం వచ్చిందన్నారు.
ఆ నిబంధన వల్లే
ఆ సీరియల్ పూర్తయ్యేవరకు వార్తలు చదివేందుకు వీల్లేదనే నిబంధనలు ఉండేవని, దీంతో ఆ సీరియల్ చిత్రీకరణ జరిగిన పదమూడు వారాలు తాను దూరదర్శన్లో వార్తలు చదవలేదని చెప్పారు. ఆ సమయంలోనే వదంతులు వచ్చాయన్నారు. నన్ను ఎవరూ కిడ్నాప్ చేయలేదు, బెదిరించలేదన్నారు. ఓ పార్టీ అగ్రనేత పరువుకు భంగం కలిగించే వదంతులు రావడం దారుణమన్నారు.
కళంకం తెచ్చేలా అవాస్తవాలు సరికాదు
ఓ పదవిలో ఉన్న వ్యక్తి ప్రతిష్టకు కళంకం తెచ్చేలా అవాస్తవాలు చెప్పడం సరికాదని ఫాతిమా బాబు అన్నారు. ఇకపై ఇలాంటి వదంతులకు వివరణ ఇవ్వనని చెప్పారు. సంవత్సరాలు గడిచినా ఇంకా ఆ ప్రచారం అలాగే ఉండటం సరికాదని ఆమె అభిప్రాయపడ్డారు.
అయినా వదంతులు వచ్చాయి
పెళ్లికి ముందు, ఆ తర్వాత కూడా తన భర్త బాబు టీవీ ఛానల్ కార్యక్రమానికి స్వయంగా తీసుకు వెళ్లి తీసుకు వచ్చేవారని ఫాతిమా బాబు చెప్పారు. అయినా వదంతులు వచ్చాయన్నారు. ఈ సంఘటన జరిగి దాదాపు రెండు దశాబ్దాలు అవుతోంది.
అన్నాడీఎంకే పార్టీలో ఉన్నప్పటికీ
కాగా, ఫాతిమాబాబు అన్నాడీఎంకే పార్టీలో ఉన్నారు. ప్రస్తుతం ఆమె పార్టీ కార్యకలాపాలకు దూరంగా ఉన్నారు. న్యూస్ రీడర్ నుంచి ఆమె ఆ తర్వాత వెండి తెరపైకి కూడా ప్రవేశించారు.
Click it and Unblock the Notifications
Sign in with Google