డ్యాన్సర్‌పై గ్యాంగ్ రేప్: నలుగురి అరెస్టు (ఫొటోలు)

By Pratap

Published: Saturday, January 11, 2014, 9:51 [IST]

హైదరాబాద్: ముంబై డ్యాన్సర్‌పై జరిగిన అత్యాచార కేసులో హైదరాబాద్ పోలీసులు నలుగురిని అరెస్టు చేశారు. ఈవెంట్ మేనేజర్‌తో పాటు మరో ముగ్గురిని అరెస్టు చేశారు. హైదరాబాద్‌లోని సీసీఎస్‌కు బదిలీ అయింది. బాధితురాలి ఫిర్యాదుతో మహారాష్ట్రలోని వర్సోవా పోలీసులు కేసు నమోదు చేసినప్పటికీ సంఘటన మాత్రం ఆ స్టేషన్ పరిధిలో జరగలేదు. హైదరాబాదులోని గోల్కొండ పోలీసు స్టేషన్ పరిధిలో నేరం జరిగినట్లు గుర్తించారు.

కేసులో వాస్తవాలను వెలుగులోకి తెచ్చేందుకు, సంఘటన జరిగిన ప్రాంతాన్ని గుర్తించేందుకు వర్సోవా పోలీసులు బాధితురాలిని తీసుకుని ముంబై నుంచి శుక్రవారం హైదరాబాద్ చేరుకున్నారు. హైదరాబాద్ సీసీఎస్‌లో కేసు నమోదు చేశారు. దీనికి సంబంధించిన లేఖపై నగర పోలీసు కమిషనర్ అనురాగ్‌శర్మ ఆమోదముద్ర వేశారు.

డ్యాన్సర్‌ను ముంబై నుంచి హైదరాబాద్ రప్పించిన వారిలో ముగ్గుర్ని పోలీసులు గుర్తించారు. నేరం పటాన్‌చెరు, లేకపోతే హయత్‌నగర్ ప్రాంతాల్లో జరిగి ఉంటుందన్న అనుమానం వ్యక్తం చేస్తున్నారు. ముంబై పోలీసులతో పాటు మహిళా సీసీఎస్‌కు చెందిన మహిళా పోలీసులు బాధితురాలిని ప్రత్యేక వాహనంలో విమానాశ్రయానికి తీసుకెళ్లి అక్కడి నుంచి ఏయే మార్గాల్లో నిందితులు తిప్పారో తెలుసుకున్నారు.

అత్యాచారం జరిగిన ప్రదేశం కనుక నగర పరిధిలో లేకపోతే మళ్లీ కేసును సైబరాబాద్ పోలీసులకు బదిలీ చేయాల్సి వస్తుంది. కేసు సీసీఎస్‌లో నమోదైనందున శంషాబాద్ పోలీసులు దర్యాప్తులో పాలుపంచుకుంటున్నారు. బాధితురాలు ప్రస్తుతం సీసీఎస్‌లోని మహిళా పోలీసుల పర్యవేక్షణలో ఉంది. పోలీసులు రూపొందించిన వ్యూహం ఫలిస్తే రెండు, మూడు రోజుల్లోనే కేసు కొలిక్కి వచ్చే అవకాశాలు కనిపిస్తున్నాయి.

ముంబై డ్యాన్సర్ కేసు

అత్యాచారానికి గురైన ముంబై డ్యాన్సర్‌కు పోలీసులు రక్షిత అని పేరు పెట్టారు. కేసు ముంబై నుంచి హైదరాబాదుకు బదిలీ అయింది. దీంతో శుక్రవారం ఆమెను హైదరాబాదు తీసుకని వచ్చారు.