NEET ఇంత దుర్మార్గమా? నాగ్పూర్ కుర్రాడికి 'అబుదాబి'లో సెంటరా!
దేశవ్యాప్తంగా లక్షలాది మంది విద్యార్థుల భవిష్యత్తును, డాక్టర్ కలలను శాసిస్తున్న 'నీట్ యూజీ' (NEET-UG 2026) పరీక్షల నిర్వహణలో నేషనల్ టెస్టింగ్ ఏజెన్సీ (NTA) నిర్వాకం రోజురోజుకూ పరాకాష్టకు చేరుతోంది. "అసలు వీరు పరీక్షలు నిర్వహిస్తున్నారా.. లేక విద్యార్థుల జీవితాలతో చదరంగం ఆడుతున్నారా?" అనే అనుమానం కలగక మానదు. ఇప్పటికే పేపర్ లీక్ మహమ్మారితో దేశవ్యాప్తంగా మొదటి పరీక్ష రద్దయి, విద్యార్థులు తీవ్రమైన మానసిక ఆందోళనలో కూరుకుపోయారు. ఆ దెబ్బ నుంచి కోలుకోకముందే.. రేపు జరగబోయే పునఃపరీక్ష (రీ-ఎగ్జామ్) హాల్ టికెట్ల జారీలో ఎన్టీఏ చేసిన ఓ ఘోరమైన తప్పు ఇప్పుడు దేశాన్ని విస్మయానికి గురిచేస్తోంది.
జూన్ 21న జరగనున్న రీ-ఎగ్జామ్ (పునఃపరీక్ష) హాల్ టికెట్ల జారీలో ఎన్టీఏ చేసిన ఓ ఘోరమైన తప్పు ఇప్పుడు విద్యార్థి లోకాన్ని విస్మయానికి గురిచేస్తోంది. మహారాష్ట్రలోని నాగ్పూర్కు చెందిన ఒక సాధారణ విద్యార్థికి ఏకంగా దేశం దాటించి.. యూఏఈ (UAE) లోని అబుదాబిలో పరీక్షా కేంద్రాన్ని కేటాయించి చేతులు దులుపుకుంది.
నాగ్పూర్ కోరితే.. అబుదాబి ఇచ్చారు!
నాగ్పూర్కు చెందిన అబ్దుల్లా మహ్మద్ తాలిబ్ అనే 18 ఏళ్ల విద్యార్థి రీ-టెస్ట్ కోసం దరఖాస్తు చేసుకునే సమయంలో తన మొదటి ప్రాధాన్యతగా సొంత ఊరైన నాగ్పూర్ను ఎంచుకున్నాడు. ఒకవేళ అక్కడ కుదరకపోతే పక్కనే ఉన్న వార్ధా, భండారా జిల్లాలను ఆప్షన్లుగా ఇచ్చాడు. తొలిసారి పరీక్ష రాసినప్పుడు అతనికి నాగ్పూర్ లోని సరస్వతి విద్యాలయలోనే సెంటర్ వచ్చింది. అయితే, తాజాగా రీ-ఎగ్జామ్ కోసం హాల్ టికెట్ డౌన్లోడ్ చేసుకుని చూసిన ఆ విద్యార్థి, అతని కుటుంబ సభ్యులు ఒక్కసారిగా గుండె గుభేల్మంది. అక్కడ పరీక్షా కేంద్రం స్థానంలో "అబుదాబి ఇండియన్ స్కూల్, యూఏఈ" అని ముద్రించి ఉంది!
పాస్పోర్ట్ కూడా లేదు.. పరీక్షకు ఒక్కరోజే టైమ్!
పరీక్ష జరగడానికి కేవలం ఒక రోజు మాత్రమే సమయం ఉండగా ఈ గందరగోళం వెలుగుచూసింది. అన్నింటికంటే దారుణమైన విషయం ఏంటంటే, ఆ విద్యార్థికి కనీసం పాస్పోర్ట్ కూడా లేదు! ఇలాంటి స్థితిలో వీసా, పాస్పోర్ట్ ఫార్మాలిటీస్ పూర్తి చేసుకుని, వేలాది రూపాయలు ఖర్చు పెట్టి విమాన టికెట్లు బుక్ చేసుకుని 2,500 కిలోమీటర్ల దూరంలో ఉన్న అబుదాబికి ఒకే ఒక్క రోజులో ఎలా వెళ్లగలరని విద్యార్థి తల్లిదండ్రులు కన్నీరుమున్నీరయ్యారు. హాల్ టికెట్ చూసినప్పటి నుండి ఆ విద్యార్థి తీవ్రమైన డిప్రెషన్లోకి వెళ్లిపోయి ఏడుస్తూ కూర్చున్నాడని, అసలు పరీక్షే రాయనని మొండికేసి మానసిక క్షోభ అనుభవించాడని తండ్రి మహ్మద్ తాలిబ్ ఆవేదన వ్యక్తం చేశారు.
ఇది విద్యార్థుల జీవితాలతో ఆటలాడటమే!
ఈ దారుణమైన ఘటనపై రాజకీయ, సామాజిక వర్గాల నుంచి తీవ్ర విమర్శలు వ్యక్తమవుతున్నాయి. మహారాష్ట్ర మాజీ విద్యాశాఖ మంత్రి, కాంగ్రెస్ నేత డాక్టర్ అనీస్ అహ్మద్ ఈ వ్యవహారంపై తీవ్ర ఆగ్రహం వ్యక్తం చేశారు. "ఇది విద్యార్థుల కెరీర్తో చెలగాటమాడటమే. ఇప్పటికే పేపర్ లీక్ వివాదంతో తీవ్ర ఒత్తిడిలో ఉన్న పిల్లలపై ఇటువంటి ఘోర తప్పిదాలతో ఎన్టీఏ మరింత మానసిక దాడి చేస్తోంది. ప్రభుత్వ యంత్రాంగం ఎప్పుడు మారుతుంది?" అంటూ ఆయన ధ్వజమెత్తారు.
బాధిత కుటుంబం వెంటనే ఎన్టీఏ హెల్ప్లైన్ను ఆశ్రయించి, కాంగ్రెస్ నేతల సమక్షంలో గట్టిగా నిలదీయడంతో అధికారులు దిగొచ్చారు. డేటాబేస్ అప్డేట్ చేసే క్రమంలో జరిగిన 'సాంకేతిక లోపం' (Technical Glitch) కారణంగానే ఈ తప్పు జరిగిందని ఎన్టీఏ సమర్థించుకుంది. తీవ్ర దుమారం రేగడంతో, వెంటనే తప్పు సరిదిద్దుతామని హామీ ఇచ్చి, సదరు విద్యార్థికి నాగ్పూర్ లోనే తిరిగి స్థానిక పరీక్షా కేంద్రాన్ని కేటాయిస్తూ సవరించిన హాల్ టికెట్ను జారీ చేశారు.
అయినప్పటికీ, కేవలం ఒకే ఒక్క విద్యార్థి విషయంలోనే కాకుండా.. చాలా మంది విద్యార్థులకు వారు కోరని సుదూర ప్రాంతాల్లో, ఇతర జిల్లాల్లో కేంద్రాలను కేటాయించారంటూ తల్లిదండ్రులు మండిపడుతున్నారు. దేశంలోనే అత్యున్నతమైన మెడికల్ ఎంట్రన్స్ ఎగ్జామ్ను ఇంత బాధ్యతారాహిత్యంగా నిర్వహిస్తారా అంటూ ఎన్టీఏ తీరుపై దేశవ్యాప్తంగా తీవ్ర నిరసనలు వ్యక్తమవుతున్నాయి
క్షుణ్ణంగా క్రాస్ చెక్ చేసుకోండి..
ఈ నేపథ్యంలో తెలుగు రాష్ట్రాల (ఆంధ్రప్రదేశ్, తెలంగాణ) నీట్ అభ్యర్థులకు విద్యా రంగా నిపుణులు ఒక ముఖ్యమైన అలర్ట్ జారీ చేస్తున్నారు. ఎన్టీఏ సాంకేతిక లోపాల ట్రాక్ రికార్డ్ చూస్తుంటే ఏ క్షణంలో ఎవరి సెంటర్ ఎక్కడ మారుతుందో చెప్పలేము. కాబట్టి, విద్యార్థులు ఎవరూ కూడా చివరి నిమిషం వరకు నిర్లక్ష్యంగా ఉండకుండా, మరోసారి మీ హాల్టికెట్లను డౌన్లోడ్ చేసుకుని పరీక్షా కేంద్రాన్ని (సెంటర్) క్షుణ్ణంగా క్రాస్ చెక్ చేసుకోండి. చివరి నిమిషంలో ఇబ్బంది పడకుండా ముందే అప్రమత్తం కావడం ఎంతో శ్రేయస్కరం.
Click it and Unblock the Notifications
Sign in with Google