600 డ్రోన్లతో పాక్ అటాక్ - బీఎస్ఎఫ్ ఐజీ

ఆపరేషన్ సిందూర్ సమయంలో పాకిస్థాన్ భారీ స్థాయిలో డ్రోన్లను ప్రయోగించిన విషయం తెలిసిందే. ఇండియన్ ఎయిర్ ఫోర్స్ వాటిని విజయవంతంగా ఎదుర్కొంది. కాగా ఇప్పుడు ఆ విషయాల గురించి బీఎస్ఎఫ్ గుజరాత్ ఐజీ అభిషేక్ పాఠక్ మీడియాతో మాట్లాడుతూ కీలక వ్యాఖ్యలు చేశారు. ఒక్క ఆపరేషన్ సిందూర్ సమయంలోనే పాకిస్థాన్ 600 కంటే ఎక్కువ డ్రోన్లను భారత సరిహద్దుల్లోకి పంపిందని తెలిపారు. కానీ భారత ఎయిర్ డిఫెన్స్ సిస్టమ్ వాటిని సమర్థవంతంగా కూల్చి వేసిందని పేర్కొన్నారు.

మే 8 తర్వాత పాకిస్థాన్ డ్రోన్లు పని చేయలేదని.. వారి డేటా, ప్రణాళికలన్నీ మన డిఫెన్స్ ముందు విఫలమయ్యాయని స్పష్టం చేశారు. ఎలాంటి ప్రాణ నష్టం లేకుండా, పౌరులు, భద్రతా సిబ్బంది సురక్షితంగా ఉన్నారని చెప్పారు. పాక్ ప్రయోగించిన 600 డ్రోన్లలో సుమారు 200 డ్రోన్లు గుజరాత్ భూభాగంలోకి ప్రవేశించాయని.. అయినా అవి ఎలాంటి నష్టం కలిగించలేదని ఐజీ వివరించారు.

అలానే ఆపరేషన్ సిందూర్‌లో మహిళా జవాన్లు కీలక పాత్ర పోషించారని పాఠక్ చెప్పారు. 800 మందికి పైగా మహిళా బీఎస్ఎఫ్ సిబ్బంది ఈ ఆపరేషన్‌లో పాల్గొనగా.. ముఖ్యంగా క్రీక్ ప్రాంతంలో అసిస్టెంట్ కమాండెంట్లు అమన్‌దీప్, నీతి యాదవ్ తమ బెటాలియన్లకు సమర్థ నాయకత్వాన్ని చూపినట్లు కొనియాడారు.

మరోవైపు ఈ ఆపరేషన్‌లో పాకిస్థాన్‌కు తీవ్రమైన నష్టం జరిగిందని ఐజీ తెలిపారు. జైషే మహ్మద్ ఉగ్రవాద సంస్థకు చెందిన 20 మందికి పైగా ఉగ్రవాదులు హతమయ్యారని వివరించారు. అలాగే పాకిస్థాన్ ఆర్మీకి చెందిన 35 నుంచి 45 మంది సిబ్బంది ప్రాణాలు కోల్పోయినట్లు ఆయన వెల్లడించారు. ఈ పరిస్థితుల్లోనే గుజరాత్‌లోని కచ్ జిల్లాతో పాటు రాజస్థాన్‌లోని బార్మేర్ వరకు బీఎస్ఎఫ్ నిరంతర పహారాతో నిఘా కొనసాగుతుందని పాఠక్ తెలిపారు.

English summary

BSF Gujarat IG Abhishek Pathak revealed that Pakistan sent more than 600 drones into Indian borders during Operation Sindoor.