Hyundai i20 కారులోనే పేలుళ్లు

చరిత్రను పంచుకునే చారిత్రక ఎర్రకోట సమీపంలో సోమవారం సాయంత్రం జరిగిన భయంకరమైన కారు పేలుడు దేశ రాజధానిని కుదిపేసింది. రద్దీగా ఉండే ప్రాంతంలో జరిగిన ఈ దుర్ఘటనలో అమాయక పౌరులు ప్రాణాలు కోల్పోవడంతో నగరమంతా తీవ్ర విషాదంలో మునిగిపోయింది.

ఎర్రకోట మెట్రో స్టేషన్ గేట్ నెం. 1 సమీపంలో సాయంత్రం 6:52 గంటల ప్రాంతంలో నిలిపి ఉంచిన హ్యుందాయ్ ఐ20 (Hyundai i20) కారులో ఈ ఘోర పేలుడు సంభవించింది. పేలుడు తీవ్రతకు కారు పూర్తిగా ధ్వంసం కాగా, చుట్టుపక్కల ఉన్న ఇతర వాహనాలకు కూడా మంటలు అంటుకుని, రోడ్డుపై చెల్లాచెదురుగా పడ్డాయి.

ఈ దుర్ఘటనలో 13 మంది మరణించగా, 24 మంది గాయపడ్డారు. మృతదేహాలు ఛిద్రమవ్వడంతో పేలుడు ఎంత శక్తివంతంగా జరిగిందో అర్థం చేసుకోవచ్చు. ఒక్కసారిగా పెద్ద శబ్దంతో పేలుడు సంభవించడం, పొగ, మంటలు చుట్టుపక్కల వ్యాపించడంతో ఆ ప్రాంతంలో గందరగోళం నెలకొందని ప్రత్యక్ష సాక్షులు వివరించారు.

పేలుడుకు గల కారణాలపై ఢిల్లీ పోలీసులు దర్యాప్తు ముమ్మరం చేశారు. ఇది చాలా శక్తివంతమైన పేలుడు అని పోలీసు వర్గాలు ధృవీకరించాయి. కారులో పేలుడు పదార్థాలు అమర్చబడ్డాయా లేదా మరేదైనా కారణమా అనే కోణంలో దర్యాప్తు జరుగుతోంది. ప్రయాణికులతో వెళ్తున్న కారు నుంచే పేలుడు సంభవించినట్లు పోలీసులు గుర్తించారు.

అగ్నిమాపక, రెస్క్యూ బృందాలు క్షతగాత్రులను వెంటనే ఆసుపత్రికి తరలించగా, భద్రతా దళాలు ఆ ప్రాంతాన్ని తమ ఆధీనంలోకి తీసుకుని, చుట్టుముట్టాయి.ఈ విషాద ఘటనపై దేశ ప్రధానమంత్రి నరేంద్ర మోదీ తీవ్ర విచారం వ్యక్తం చేశారు. మృతుల కుటుంబాలకు ఎక్స్ (X) ద్వారా సంతాపాన్ని తెలియజేశారు.

ఢిల్లీలో ఈ సాయంత్రం జరిగిన పేలుడులో తమ ప్రియమైన వారిని కోల్పోయిన వారికి నా సంతాపం. గాయపడినవారు త్వరగా కోలుకోవాలని కోరుకుంటున్నాను. హోంమంత్రి అమిత్ షాతో పాటు ఇతర అధికారులతో పరిస్థితిని సమీక్షించాను. బాధితులకు అధికారులు అన్ని విధాలా సహాయం అందిస్తున్నారు అని మోదీ ఎక్స్ (X)లో పోస్ట్ చేశారు. ప్రస్తుతం NIA, NSG బృందాలు దర్యాప్తు చేస్తుండగా, ఢిల్లీతో పాటు దేశవ్యాప్తంగా హై అలర్ట్ కొనసాగుతోంది.

English summary

PM Modi Condoles Red Fort Blast Victims: 13 Killed in Hyundai i20 Explosion; NIA Probes Terror Angle