ప్రధాని మోదీ అతిపెద్ద నిర్ణయం- కాన్వాయ్ లో కోత?
ప్రధాని నరేంద్ర మోదీ చేసిన వ్యాఖ్యలు దేశవ్యాప్తంగా చర్చనీయాంశమౌతోన్నాయి. సంవత్సరం పాటు బంగారం కొనుగోళ్లను నిలిపివేయాలని మోదీ సూచించారు. బంగారాన్ని కొనకుండా ఉండాలని కోరారు. వర్క్ ఫ్రమ్ హోమ్ పద్ధతులను అవలంబించాలని, దేశీయ లేదా అంతర్జాతీయ అనవసర ప్రయాణాలను తగ్గించుకోవాలని చెప్పారు. పెట్రోల్, డీజిల్ తో పాటు చివరికి వంటనూనె వినియోగాన్ని సైతం తగ్గించుకోవాలని సూచించారు.
ఈ పరిణామాల మధ్య ఆయన అతిపెద్ద నిర్ణయాన్ని తీసుకున్నారు. తన కాన్వాయ్ పరిమాణాన్ని 50 శాతం తగ్గించాలని ఆదేశించారు. పెట్రోల్, డీజిల్ ఆదా, విస్తృత ఆర్థిక పొదుపు చర్యలలో భాగంగా ఎలక్ట్రిక్ వాహనాలను ఎక్కువగా ఉపయోగించాలని సూచించారు. ఇరాన్ యుద్ధంతో ముడిపడి ఉన్న ఆర్థిక సంక్షోభం దృష్ట్యా ఈ నిర్ణయం తీసుకున్నారని ఇండియా టుడే టీవీ వెల్లడించింది. దీనిపై ఓ ప్రత్యే కథనాన్ని ప్రసారం చేసింది. విశ్వసనీయ వర్గాలను తన కథనంలో ఉటంకించింది.
దీని ప్రకారం.. ప్రధాని కాన్వాయ్లోని వాహనాల సంఖ్యను తగ్గించాలని స్పెషల్ ప్రొటెక్షన్ గ్రూప్ కు సూచనలు జారీ అయ్యాయి. తప్పనిసరి భద్రతా నిబంధనలకు ఎటువంటి భంగం వాటిల్లకుండా చూసుకోవాలని మోదీ స్పష్టం చేశారు. ఈ ఆదేశాలను ఎస్పీజీ ఇప్పటికే అమలు చేయడం ప్రారంభించింది. ఎలక్ట్రిక్ వాహనాల వినియోగాన్ని పెంచాలని ప్రధాని మోడీ కోరారు. దీని కోసం కొత్త వాహనాలను కొనుగోలు చేయరాదని చెప్పారు.
క్రూడ్ ఆయిల్ ధరల పెరుగుదల వల్ల తలెత్తే ఆర్థిక పరిణామాల నేపథ్యంలో ప్రధాని మోదీ ఈ నిర్ణయం తీసుకున్నారనేది స్పష్టమౌతోంది. అలాగే దేశ ప్రజలకు పొదుపు చర్యలు పాటించాలని కూడా విజ్ఞప్తి చేస్తూ వస్తోన్నారు. ఒక సంవత్సరం పాటు బంగారం కొనొద్దని, అనవసర విదేశీ ప్రయాణాలను వాయిదా వేసుకోవాలని, పెట్రోల్, డీజిల్ వినియోగాన్ని తగ్గించాలని చెబుతోన్నారు. ఇటువంటి చర్యలు ఆర్థిక వ్యవస్థపై ఒత్తిడిని తగ్గిస్తాయనేది ఆయన ఆలోచన.
ప్రస్తుతం ఈ పొదుపు చర్యలు ప్రభుత్వాలు, వివిధ మంత్రిత్వ శాఖలలోనూ ప్రతిబింబిస్తున్నాయి. పలు కేంద్ర మంత్రిత్వ శాఖలు ఇంధన ఆదా చర్యలను అన్వేషిస్తున్నట్లు తెలుస్తోంది. మధ్యప్రదేశ్, రాజస్థాన్ వంటి బీజేపీ పాలిత రాష్ట్రాల ముఖ్యమంత్రులు కూడా తమ అధికారిక కాన్వాయ్లను తగ్గించాలని ఆదేశించారు. కేంద్ర మంత్రి సీఆర్ పాటిల్ కూడా ఈ పొదుపు ప్రయత్నంలో భాగంగా తన ఎస్కార్ట్ వాహనాన్ని వాడకాన్ని నిలిపివేయాలని నిర్ణయించారని వార్తలు వెలువడ్డాయి.
Click it and Unblock the Notifications
Sign in with Google