భారత్ లోని ఈ స్టేషన్ నుంచి నేపాల్ కు డైరెక్ట్ వీక్లీ ఎక్స్‌ప్రెస్ ట్రైన్- 10 హాల్ట్ స్టేషన్లు
భారత్, నేపాల్ మధ్య సుదీర్ఘ కాలంగా ఉన్న సాంస్కృతిక బంధాలను మరింత బలోపేతం కానున్నాయి. ఈ రెండు దేశాల మధ్య ఓ వీక్లీ ఎక్స్‌ప్రెస్ అందుబాటులోకి రాబోతోంది. నేపాల్‌లోని ప్రసిద్ధ పుణ్యక్షేత్రం, సీతమ్మ తల్లి జన్మస్థలం జనక్పుర్, శ్రీరాముడి జన్మభూమి ఉత్తర్ ప్రదేశ్‌లోని అయోధ్య మధ్య నూతన వీక్లీ ఎక్స్‌ప్రెస్ ప్రారంభం కాబోతోంది. దీనికి రైల్వేబోర్డు ఆమోదం సైతం తెలిపింది. రామాయణంతో ముడిపడి ఉన్న ఈ రెండు పవిత్ర క్షేత్రాల మధ్య రైలు సౌకర్యం అందుబాటులోకి వస్తోండటం ప్రాధాన్యతను సంతరించుకుంది.
అయోధ్య- జనక్ పూర్ మధ్య దూరం సుమారు 604 కిలోమీటర్లు. దీనికి సంబంధించిన రూట్ ఖరారైంది కూడా. ఉత్తరప్రదేశ్, బీహార్ మీదుగా ఈ రైలు రాకపోకలు సాగించనుంది. మొత్తం 10 స్టేషన్లల్లో దీనికి హాల్ట్ సౌకర్యం ఉంది. ఈ రైలు టైమింగ్స్, టికెట్ ధర ఇంకా వెల్లడి కావాల్సి ఉంది. ఈ నెల 22వ తేదీన భారత్, నేపాల్ ప్రధానమంత్రులు నరేంద్ర మోదీ, బాలేన్ షా వర్చువల్ విధానంలో సంయుక్తంగా ఈ రైలును ప్రారంభించే అవకాశం ఉంది. దీనిపై అధికారిక ప్రకటన ఇంకా వెలువడాల్సి ఉంది.
ఇది వీక్లీ ఎక్స్ ప్రెస్ ఒకసారి మాత్రమే అందుబాటులో ఉంటుంది. ప్రతి శనివారం జనక్పుర్ నుండి, తిరుగు ప్రయాణంలో ప్రతి సోమవారం అయోధ్య కంటోన్మెంట్ నుండి ఈ రైలు బయలుదేరుతుంది. జనక్పుర్ ధామ్ నుండి బయలుదేరే ఈ ఎక్స్‌ప్రెస్ రైలు.. బీహార్ లోని జయానగర్, సీతామఢి, మధుబని, శీషో, రక్సౌల్, నరకటియాగంజ్, ఉత్తర్ ప్రదేశ్ లోని గోరఖ్ పూర్, బస్తీ, మన్ కా పూర్ స్టేషన్ల గుండా అయోధ్య కంటోన్మెంట్ కు చేరుకుంటుంది.
ఈ ఎక్స్ ప్రెస్ రైలు సమయ వేళలు, టికెట్ ధరలు, ట్రైన్ నంబర్లు, అడ్వాన్స్ బుకింగ్ తేదీలకు సంబంధించిన పూర్తి వివరాలు త్వరలోనే రైల్వే శాఖ అధికారికంగా ప్రకటించనుంది. ఈ నూతన రైలు అందుబాటులోకి రావడం వల్ల భారత్-నేపాల్ మధ్య పర్యాటకం గణనీయంగా పుంజుకునే అవకాశం ఉంది. ప్రత్యేకించి రామాయణ సర్క్యూట్ ఆధారిత పర్యాటక రంగానికి ఇది ఎంతగానో తోడ్పడుతుంది.
విద్యార్థులు, వ్యాపారులు, రోజువారీ అవసరాల కోసం ఇరు దేశాల మధ్య ప్రయాణించే వారికి కూడా ఈ సర్వీసు ఉపకరిస్తుంది. హిమాలయాలను మరింత దగ్గరగా చూడాలనుకునే వారికి ఈ రైలు దోహదపడుతుంది. దీని ద్వారా సరిహద్దు ప్రాంతాల్లో పర్యాటకం, హోటల్స్, చేతివృత్తుల కళాకారులు, స్థానిక వర్తకులకు నూతన అవకాశాలు లభించినట్టవుతుంది. వైద్య అవసరాల కోసం భారత్ రావాలనుకునే నేపాల్ ప్రజలకు ఈ ఎక్స్ ప్రెస్ ఉపయోగపడుతుంది.
Click it and Unblock the Notifications
Sign in with Google
