రాజస్థాన్ మంత్రిపై రేప్ కేసు: కుట్ర అని వ్యాఖ్య

జైపూర్: రాజస్థాన్‌లో ఓ మంత్రిపై అత్యాచారం ఆరోపణలపై మంగళవారం పోలీసు కేసు నమోదైంది. ఆ మంత్రి దీన్ని రాజకీయ కుట్రగా కొట్టిపారేస్తున్నారు. రాజస్థాన్ పాడిపరిశ్రమలు, ఆహారం, పౌరసరఫరాల సహాయ మంత్రి బాబూలాల్ నాగర్‌పై అత్యాచారం కేసు నమోదైంది. ఈ నెల 11వ తేదీన తనను మంత్రి తన ఇంటికి రమ్మని పిలిచి, కొట్టి తనపై అత్యాచారం చేశారని ఒక మహిళ ఫిర్యాదు చేసింది.

తనపై అత్యాచారం చేసిన విషయాన్ని బయటపెడితే తీవ్రపరిణామాలు ఎదుర్కోవాల్సి ఉంటుందని తనను బెదిరించారని కూడా ఫిర్యాదులో చెప్పింది. ఈ ఆరోపణల ఆధారంగా మంత్రిపై కేసు నమోదు చేయాల్సిందిగా జ్యుడీషియల్ మేజిస్ట్రేట్ ఇచ్చిన ఆదేశాల మేరకు ఆయనపై ఐపీసీ సెక్షన్ 376, 323 కింద కేసులు నమోదు చేసినట్టు పోలీసులు తెలిపారు. ఈ కేసును సిఐడి క్రైమ్ బ్రాంచ్‌కు రెఫర్ చేసినట్టు తెలిపారు.

త్వరలో ఎన్నికలు జరగనున్న నేపథ్యంలో ఇది రాజకీయ ప్రత్యర్థులు తనపై పన్నిన కుట్ర అని బాబూలాల్ నాగర్ మండిపడ్డారు. ఆ మహిళ తన ప్రత్యర్థులు ఆడించినట్టల్లా ఆడి తనను అప్రతిష్ఠపాలు చేసేందుకు ప్రయత్నిస్తోందని, ఈ కేసుకు సంబంధించి ఎలాంటి విచారణనైనా ఎదుర్కొనేందుకు తాను సిద్ధమని అన్నారు.

ఈ నెల 11వ తేదీన తాను ఉదయం 8 నుంచి రాత్రి 8వరకు తన నియోజకవర్గం ప్రజలను కులుసుకోవడంతోనే తనకు సరిపోయిందని, ఆ రోజు తన కుటుంబ సభ్యులు కూడా తన నివాసంలో ఉన్నారని ఆయన అన్నారు. ఆ మహిళ జిల్లా పరిషత్ ఎన్నికల్లో పోటీ చేయడానికి టికెట్ అడిగిందని, అయితే కాంగ్రెసు అందుకు నిరాకరించిందని ఆయన చెప్పారు.

English summary

A Rajasthan minister was on Tuesday booked for allegedly beating up and raping a woman at his residence here, a charge he claimed as "political conspiracy" to malign his image ahead of the assembly polls.