‘డాన్’కు క్లీన్చిట్: సోమనాథ్ భారతికి బెయిల్
న్యూఢిల్లీ: ఆమ్ఆద్మీ పార్టీ(ఆప్) ఎమ్మెల్యే, న్యాయశాఖ మాజీ మంత్రి సోమ్నాథ్ భారతి పెంపుడు కుక్క ‘డాన్'కు ఢిల్లీ కోర్టు క్లీన్చిట్ ఇచ్చింది. భారతిపై ఆయన భార్య లిపికామిత్ర గృహహింస కేసు పెట్టంతో ఆయనను పోలీసులు అరెస్టుచేసిన విషయం తెలిసిందే.
భారతి పెంచుకొంటున్న లాబ్రాడార్ శునకంతో తనను కరిపించారని లిపికామిత్ర ఆరోపించటంతో జంతువైద్యుల పర్యవేక్షణలో ఆ శునకాన్ని పరీక్షించారు. అయితే, ఇతరులను కరువాలని సోమ్నాథ్ భారతి ఇచ్చిన ఆదేశాలకు డాన్ స్పందించలేదు. దీంతో లిపికామిత్ర ఆరోపణలను కొట్టివేస్తూ అడిషనల్ సెషన్స్ జడ్జి అనిల్కుమార్ బుధవారం డాన్కు క్లీన్చిట్ ఇచ్చారు.
సోమనాథ్ భారతికి బెయిల్
గృహ హింస, హత్యాయత్నం కేసుల్లో అరెస్టయిన ఆప్ ఎమ్మెల్యే మంత్రి సోమ్నాథ్ భారతికి బెయిల్ మంజూరైంది. తనకు బెయిల్ మంజూరు చేయాలని ఇటీవల ఆయన దాఖలు చేసిన పిటిషన్ను విచారించిన ఢిల్లీ సిటీ కోర్టు బుధవారం బెయిల్ మంజూరు చేసింది.
లక్ష రూపాయల వ్యక్తిగత పూచికత్తును సమర్పించాలని, విచారణ పూర్తయ్యేంత వరకు దేశం విడిచి వెళ్లరాదని న్యాయస్థానం ఆదేశించింది.