అన్నంత పనీ చేసిన రేణుక: కిరణ్ ‘శూర్పణఖ’పై ప్రివిలేజ్ నోటీసు, అసలేం జరిగిందంటే?

Updated: Friday, February 9, 2018, 12:59 [IST]

Recommended Video

Renuka Chowdhury Issue : Here Are The Reactions Of Politicians And Parties

న్యూఢిల్లీ: కాంగ్రెస్ ఎంపీ రేణుకా చౌదరి చెప్పినట్లుగానే.. కేంద్రమంత్రి కిరణ్ రిజిజుకు ప్రివిలేజ్ నోటీసులు జారీ చేశారు. 'శూర్పణక నవ్వు' సోషల్ మీడియా పోస్టుకు గానూ శుక్రవారం ఉదయం రాజ్యసభలో ఆమె హక్కుల తీర్మానం కూడా ప్రవేశపెట్టారు.

పార్లమెంటులో రేణుకా చౌదరి పెద్దగా నవ్వడంపై ప్రధాని మోడీ చేసిన వ్యాఖ్యలు, ఆ తర్వాత ఆమెనుద్దేశించి కేంద్రమంత్రి కిరణ్ రిజిజు సోషల్ మీడియాలో పెట్టిన పోస్టు వివాదాస్పదమైన విషయం తెలిసిందే.

‘శూర్పణఖ’ పోస్టు

రామాయణం సీరియల్‌లోని శూర్పణఖ పాత్ర నవ్వుతున్న వీడియోకి.. మోడీ మాట్లాడిన సమయంలో రేణుకా చౌదరి నవ్వుతున్న దృశ్యాలను కిరణ్ రిజిజు జత చేసి సోషల్ మీడియాలో పోస్టు చేశారు. అయితే, కొద్దిసేపటి తర్వాత దాన్ని తొలగించారు. దీనిపై రేణుకా చౌదరి తీవ్ర ఆగ్రహం వ్యక్తం చేశారు.

కించపర్చారంటూ..

రాజ్యసభలో తన నవ్వుపై మోడీ వ్యాఖ్యలను జతచేస్తూ.. కిరణ్ రిజిజు పోస్టుపై హక్కుల తీర్మానాన్ని ఆమె శుక్రవారం రాజ్యసభలో ప్రవేశపెట్టారు. ‘ఇది ఓ మహిళను అవమానించడమే కాదు, తీవ్ర అభ్యంతరం కూడా.. దీనిపై నేను హక్కుల నోటీసు తీర్మానం ప్రవేశపెట్టాను' అని రేణుకా తెలిపారు.

పెద్దగా నవ్విన రేణుక

కాగా, రాష్ట్రపతి ప్రసంగానికి ధన్యవాదాలు తెలిపే తీర్మానంపై చర్చ సందర్భంగా ప్రధాని నరేంద్ర మోడీ మాట్లాడుతుండగా.. రేణుకా చౌదరి సభ మొత్తం వినబడేలా పెద్దగా నవ్వుతూనే ఉన్నారు. దీంతో ఆమెపై రాజ్యసభ ఛైర్మన్ వెంకయ్యనాయుడు ఆగ్రహం వ్యక్తం చేశారు. ఏదైనా సమస్య ఉంటే వైద్యుడి వద్దకు వెళ్లాలని సూచించారు. సభ్యులు క్రమశిక్షణ పాటించాలని కోరారు.

సౌభాగ్యమంటూ మోడీ..

అయితే, ప్రధాని మోడీ కల్పించుకుని రేణుకా చౌదరిని ఏమీ అనవద్దని.. ‘రామాయణం సీరియల్ తర్వాత ఆ నవ్వు వినే భాగ్యం ఇప్పుడు మనకు కలిగింది' అని వ్యంగ్యాస్త్రాలు సంధించిన విషయం తెలిసిందే. దీంతో సభలో అధికార పార్టీ సభ్యులు నవ్వులు చిందించారు. దీనిపై కాంగ్రెస్ తోపాటు ప్రతిపక్షాలు అభ్యంతరం వ్యక్తం చేశాయి.

అందుకే నవ్వా అంటూ రేణుక

కాగా, ‘గతంలో ప్రధాని నరేంద్ర మోడీ ఆధార్ కార్డు అవసరం లేదని పెద్ద ప్రసంగమే చేశారు. అలాంటిది ఆధార్‌ను పుట్టించింది తామేనని చెప్తే నవ్వు రాకుండా ఉంటుందా' అని రేణుకా చౌదరి తన నవ్వుపై వివరణ ఇచ్చుకున్నారు.