ఒక్క బ్యాగులో 18 పిస్టల్స్.. షాక్ అయిన రైల్వే పోలీసులు

కోల్ కతాలోని హౌరా రైల్వే స్టేషన్ లో తనిఖీలు నిర్వహిస్తుండగా ఓ బ్యాగులో 18 పిస్టల్స్ కనిపించడంతో రైల్వే ప్రొటెక్షన్ ఫోర్స్(ఆర్పీఎఫ్) సిబ్బంది షాకయ్యారు.

కోల్ కతా: తనిఖీలు నిర్వహిస్తుండగా ఓ బ్యాగులో 18 పిస్టల్స్ కనిపించడంతో రైల్వే ప్రొటెక్షన్ ఫోర్స్(ఆర్పీఎఫ్) సిబ్బంది షాకయ్యారు. కోల్ కతాలోని హౌరా రైల్వే స్టేషన్ లో శుక్రవారం రాత్రి ఈ ఘటన చోటు చేసుకుంది.

సాధారణ తనిఖీలు నిర్వహిస్తున్న ఆర్పీఎఫ్, జీఆర్పీ సిబ్బందికి అనుమానాస్పదంగా పడి ఉన్న బ్యాగు కనిపించింది. దాన్ని తెరిచి చూసిన పోలీసులు ఉలిక్కిపడ్డారు. బ్యాగు నిండా 9 ఎంఎం పిస్టల్స్ కనిపించాయి. లెక్కబెట్టి చూస్తే మొత్తం 18 ఉన్నాయి.

హౌరా ముఖద్వారంగా భావించే అత్యంత రద్దీగా ఉండే హౌరా రైల్వే స్టేషన్ లో ఉన్నట్లుండి ఇంత పెద్ద మొత్తంలో ఆయుధాలు లభించడంపై విస్మయం వ్యక్తమవుతోంది. దీనిపై హౌరా స్టేషన్ లో పలువురు వ్యక్తులు, వ్యాపారులను పోలీసులు ప్రశ్నించడం ప్రారంభించారు.

అన్ని పిస్టల్స్ ఉన్న బ్యాగు ఎక్కడి నుంచి వచ్చింది? వాటిని తీసుకొచ్చిన వారు పోలీసులు తనిఖీ చేస్తుండడం గమనించి ఆ బ్యాగును అక్కడే వదిలేసి పలాయనం చిత్తగించారా? ఏదైనా ఘటన కోసమే వాటిని తీసుకొచ్చారా? ఇవి మాత్రమేనా, ఇంకేమైనా ఆయుధాల రవాణా జరిగిందా? అనే కోణంలో పోలీసులు దర్యాప్తు చేస్తున్నారు.

English summary

Kolkata railway protection force(rpf) recovered 18 pistols from an unidentified bag while general checking is going on in Howrah Railway Station here on Friday night. RPF officials got shocked when they found those pistols in one bag. Police questioned passengers and near by merchants in the railway station. Search is going on to trace out for the accused.