అగ్నిజ్వాలలే అమ్మవారి రూపం:జ్వాలాముఖి శక్తిపీఠం మహిమ,పురాణ రహస్యాలు!
హిమాచల్ ప్రదేశ్లోని కాంగ్రా జిల్లా పర్వతాల మధ్య వెలసిన జ్వాలాముఖి శక్తిపీఠం ఒక అద్భుతమైన దేవాలయం. ప్రపంచంలోనే మరెక్కడా లేని విధంగా ఇక్కడ అమ్మవారు కేవలం అగ్ని జ్వాలల రూపంలో భక్తులకు సాక్షాత్కరిస్తారు. ఈ దివ్య క్షేత్రంలోకి అడుగు పెట్టగానే, మనలోని చీకట్లు తొలగిపోయి భక్తి వెలుగులు నిండిన అనుభూతి కలుగుతుంది.
ఆరిపోని అద్భుతం: ఆలయ ప్రత్యేకత ఏమిటి?
జ్వాలాముఖి ఆలయంలో విగ్రహం ఉండదు. పర్వత గర్భం నుంచి వెలువడే తొమ్మిది దివ్య జ్వాలలే ఇక్కడ దేవత రూపం. ఈ జ్వాలలను వెలిగించడానికి ఎలాంటి నూనె, వత్తులు లేదా నెయ్యి అవసరం లేదు. వందల సంవత్సరాలుగా, భూగర్భం నుంచి నిరంతరం స్వయంగా ఉద్భవిస్తూనే ఉన్న ఈ జ్వాలలను భక్తులు సాక్షాత్తు దేవి స్వరూపంగా, జీవ జ్యోతిగా కొలుస్తారు. సైంటిస్టులకు, పరిశోధకులకు కూడా ఈ జ్వాలలు ఎలా వెలుగుతున్నాయో ఇప్పటికీ అంతుచిక్కని రహస్యమే.
పురాణగాథ: జిహ్వా పడిన ప్రదేశం!
పురాణాల ప్రకారం, ఈ ప్రదేశం అష్టాదశ శక్తిపీఠాలలో ఒకటి. సతీదేవి తన తండ్రి దక్షుడి యజ్ఞంలో దహనమయ్యాక, శివుడు ఆమె దేహాన్ని మోసుకుని ఉగ్రుడై విహరించాడు. ఆ సమయంలో విష్ణువు తన సుదర్శన చక్రంతో సతీదేవి దేహాన్ని 51 భాగాలుగా ఖండించగా, ఆమె గళం (నాలుక లేదా జిహ్వా) ఈ పర్వత ప్రాంతంలో పడింది. అందుకే ఈ క్షేత్రానికి జ్వాలాముఖి శక్తిపీఠం అని పేరు వచ్చింది.
ప్రధాన ఉత్సవాలు,యాత్ర ఫలం
- నవరాత్రులు: ఇక్కడ జరిగే ప్రధాన ఉత్సవం నవరాత్రి ఉత్సవాలు. ఈ తొమ్మిది రోజులు వేలాది మంది భక్తులు హాజరై అమ్మవారి జ్వాలలను దర్శించుకుంటారు.
- దీపావళి: దీపావళి రోజున జ్వాలాదేవి అగ్నిజ్వాలలు మరింత ప్రకాశవంతంగా, ప్రబలంగా వెలుగుతాయని భక్తుల ప్రగాఢ విశ్వాసం.
జ్వాలాముఖి ఆలయాన్ని దర్శించుకోవడం కేవలం పుణ్యయాత్ర మాత్రమే కాదు. ఈ దివ్య జ్వాలలను ఒక్కసారి చూసినా, మనిషి తనలోని అజ్ఞానాన్ని, అహంకారాన్ని వదిలించుకోగలుగుతారని, తద్వారా పాపరహితులు అవుతారని స్థానికులు చెబుతారు. అమ్మవారి జ్వాలలలో వెలిగే దైవ జ్ఞానాన్ని పొందడానికి యాత్రికులు దేశం నలుమూలల నుంచి ఇక్కడికి తరలివస్తారు. జ్వాలాముఖి దేవి దర్శనం ఆత్మలోని చీకటిని తరిమేసి, భక్తిలో వెలుగులు నింపే ఒక దివ్యానుభూతి.
Click it and Unblock the Notifications
Sign in with Google