టాయిలెట్‌లో కుక్క,చిరుత... ఏడు గంటలు రెస్క్యూ ఆపరేషన్... చివరకు ఏం జరిగిందంటే...

కర్ణాటకలోని బిలినెళ్లి అనే గ్రామంలో గమ్మత్తయిన ఘటన చోటు చేసుకుంది. ఓ ఇంటి టాయిలెట్‌లో వీధి కుక్కతో పాటు చిరుతపులి కనిపించింది. ఉదయాన్నే టాయిలెట్‌కు వెళ్లేందుకు ఆ ఇంటి యజమానురాలు దాని తలుపు తెరవగా చిరుతను చూసి షాక్ తిన్నది. వెంటనే టాయిలెట్ తలుపుకు బోల్ట్ పెట్టేసి ఇంట్లోకి పరిగెత్తింది. ఆపై ఆ కుటుంబ సభ్యులు పోలీసులకు,స్థానిక అధికారులకు సమాచారమిచ్చారు. ఆ చిరుతను పట్టుకునేందుకు అధికారులు దాదాపు ఏడు గంటల పాటు శ్రమించగా.. టాయిలెట్ పైకప్పు మీదుగా దూకిన చిరుత అక్కడినుంచి తప్పించుకుంది.

This photo was taken from outside through a gap in the window. It is a leopard and a dog stuck together since this morning inside the toilet of a house in Kadaba, Dakshina Kannada district. I am told the leopard escaped at 2 pm and the dog is alive! pic.twitter.com/hgjJhaXW03

— Prajwal (prajwalmanipal) February 3, 2021

అసలేం జరిగింది...

స్థానికుల కథనం ప్రకారం... బుధవారం తెల్లవారుజామున బిలినెళ్లి గ్రామంలో సంచరిస్తున్న ఓ వీధి కుక్క చిరుత పులి కంటపడింది. చిరుత ఎక్కడినుంచి వచ్చిందో తెలియదు గానీ దాన్ని చూడగానే ఆ కుక్క పరుగు అందుకుంది. ఈ క్రమంలో గ్రామంలోని ఓ ఇంటి ఆవరణలో ఉన్న మరుగుదొడ్డిలోకి చొరబడింది. అయితే ఆ చిరుత కూడా కుక్కను వెంబడిస్తూ వెళ్లి అదే టాయిలెట్‌లోకి చొరబడింది. సరిగ్గా ఉదయం 7గంటల సమయంలో ఆ ఇంటి యజమానురాలు టాయిలెట్ వెళ్లేందుకు వచ్చి తలుపు తెరిచింది. అంతే... అక్కడున్న చిరుతను చూసి జడుసుకుంది. వెంటనే తలుపు పెట్టేసి ఇంట్లోకి పరిగెత్తింది.

అదృష్టవశాత్తు ప్రాణాలతో బయటపడ్డ కుక్క...

ఆమె కుటుంబ సభ్యులకు విషయం చెప్పడం,వారు పోలీసులు,అధికారులకు సమాచారం ఇవ్వడం జరిగాయి. ఉదయం 8.45గం. సమయంలో పోలీసులు,అధికారులు సిబ్బందితో కలిసి అక్కడికి చేరుకున్నారు. ట్రాన్‌క్విలైజర్ గన్‌తో ఆ పులికి మత్తు మందు ఇచ్చి పట్టుకునేందుకు యత్నించారు. ఇందుకోసం ఆ మరుగుదొడ్డి పైకప్పును తొలగించారు. కానీ చిరుత మాత్రం పట్టుబడలేదు. ఆ పైకప్పు గోడల మీదుగా బయటకు దూకిన చిరుత అక్కడినుంచి తప్పించుకుంది. చిరుత ఎక్కడ తనను చంపేస్తుందోనని దాదాపు 7గంటల పాటు బిక్కచచ్చిపోయిన ఆ కుక్క అదృష్టవశాత్తు ప్రాణాలతో బయటపడింది.

సోషల్ మీడియాలో వైరల్...

ప్రస్తుతం ఈ ఘటనకు సంబంధించిన వీడియోలు సోషల్ మీడియాలో వైరల్‌గా మారాయి. చిరుత రెస్క్యూ ఆపరేషన్ గురించి తెలిసి స్థానికులు పెద్ద ఎత్తున అక్కడికి చేరుకున్నారు. చిరుత తప్పించుకునే సమయంలో తమ సెల్‌ఫోన్లలో వీడియోలు తీశారు. ఆపై వాటిని సోషల్ మీడియాలో అప్‌లోడ్ చేశారు. రెస్క్యూ ఆపరేషన్ సమయంలో జనం భారీగా గుమిగూడటంతో వారిని నియంత్రించడం పోలీసులకు కూడా కష్టంగా మారింది.

English summary

A dog in Karnataka’s Bilinele village found itself locked inside a toilet with a leopard for hours on Wednesday. The two animals were found inside the toilet by a local resident at 7 am and she quickly bolted the door and alerted the police.