దసరా స్పెషల్: న్యూ ట్రెండ్.. న్యూ లుక్: వీపుపై చంద్రయాన్-2, ఆర్టికల్ 370 టాటూలు: గర్భా డాన్స్ లతో!

అహ్మదాబాద్: దసరా పండుగ అనగానే హైదరాబాద్ లో ఛప్పున గుర్తుకొచ్చేది గర్భా డాన్స్. జంటనగరాల్లో స్థిరపడిన ఉత్తరాది రాష్ట్రాలకు చెందిన ప్రజలు.. ప్రత్యేకించి- గుజరాతీయులు దేవీ శరన్నవరాత్రులను అద్భుతంగా సెలబ్రేట్ చేసుకుంటారు. దసరా పండుగ కొనసాగినన్ని రోజులూ రాత్రివేళ గర్భా డాన్స్ లతో అదర గొడుతుంటారు. ఈ సందర్భంగా వారి వస్త్రధారణ ఆకట్టుకునేలా ఉంటుంది. గుజరాతీ సంప్రదాయబద్ధమైన దుస్తులు ధరించి బీట్ కు అనుగుణంగా స్టెప్స్ వేస్తూ సందడి చేస్తుంటారు. హైదరాబాద్ లోనే ఇలాంటి పరిస్థితి ఉంటే.. గర్భా నృత్యానికి పుట్టినిళ్లుగా చెప్పుకొనే గుజరాత్ లో ఇంకెంత కోలాహలం నెలకొని ఉంటోందో చెప్పుకోనక్కర్లేదు.

ఈ సారి కొత్త ట్రెండ్ లో గుజరాతీ యువత..

గుజరాతీ యువత ఈ సారి ట్రెండ్ మార్చారు. సంప్రదాయబద్ధమైన వస్త్రధారణతో పాటు కొన్ని అదనపు హంగులను సమకూర్చుకుంటున్నారు. దేశం అత్యంత ప్రతిష్ఠాత్మకంగా తీసుకున్న చంద్రయాన్-2 మిషన్ నమూనాను తమ వీపు మీద టాటూల రూపంలో వేయించుకుంటున్నారు. అది బాడీ పెయింట్. నవరాత్రులు ముగిసేంత వరకూ ఈ పెయింట్ చెక్కు చెదరనివ్వరట ఆ యువతులు. ప్రధానమంత్రి నరేంద్ర మోడీ, కేంద్ర హోం శాఖ మంత్రి అమిత్ షాల సొంత రాష్ట్రమైన గుజరాత్ లో ఈ సరికొత్త సంస్కృతికి శ్రీకారం చుట్టింది అక్కడి యువత. సామాజిక అంశాలను టాటూల రూపంలో వేయించుకుంటోంది.

ప్రతిష్ఠాత్మక ప్రాజెక్టులు టాటూలుగా..

నరేంద్ర మోడీ హయాంలో దేశంలో చోటు చేసుకున్న కీలక పరిణామాలను టాటూల రూపంలో వేయించుకుని, తమ అభిమానాన్ని చాటుకుంటున్నారు. ఒక్క చంద్రయాన్-2 మిషన్ మాత్రమే కాదు.. జమ్మూ కాశ్మీర్ కు స్వయం ప్రతిపత్తి రాష్ట్రంగా గుర్తించడానికి ఉద్దేశించిన ఆర్టికల్ 370 రద్దు ఉదంతాన్ని టాటూలుగా వేయించుకుంటున్నారు గుజరాతీ అమ్మాయిలు. దీనితో పాటు జమ్మూ కాశ్మీర్ ను రెండుగా విభజించి, కేంద్ర పాలిత ప్రాంతంగా రూపొందించడానికి అవసరమైన ఆర్టికల్ 35 ఎ, ట్రాఫిక్ నిబంధనలు, హెల్మెట్ వల్ల కలిగే ప్రయోజనాలకు సంబంధించిన చిత్రాలను కూడా తమ వీపుపై టాటూలుగా వేయించుకుంటున్నారు. దీనికి సంబంధించిన కొన్ని ఫొటోలు సోషల్ మీడియాలో వైరల్ గా మారాయి.

English summary

Pictures of the women posing with their body paint tattoos while preparing for Navratri and Raas Garba in Surat on Saturday. The women wore backless blouses as artistes painted the tattoos for them. One of the women opted for Chandrayaan-2 as a subject for her body art while another tattoo depicted a police officer putting a helmet on a man. "Follow traffic rules," the message painted beside the tattoo read. Another woman posed with her body paint tattoo that featured a pictorial representation of Article 370.