దేశంలో బెస్ట్ ట్రెక్కింగ్​ స్పాట్స్ ఇవే.. లైఫ్ ​లో ఒక్కసారైనా వెళ్లి రావాల్సిందే..!

ఇటీవలికాలంలో చాలా మంది యువత ట్రెక్కింగ్ చేస్తున్నారు. చుట్టూ పచ్చని చెట్లు, అడవులు, ఎత్తైన కొండలు, చెంతనే గలగల ప్రవాహాలు ఇలాంటి మధురమైన వాతావరణం మధ్యలో ట్రెక్కింగ్ చేయడం ఓ మధురమైన అనుభూతి. వారాంతాల్లో.. వేసవి సెలవుల్లో ఇంటిళ్లి పాది ట్రెక్కింగ్, నైట్​ క్యాంపింగ్​, బోటింగ్​ అంటూ ప్రకృతిని ఆస్వాదించడానికి ఔటింగ్​ కు వెళ్లాలి అనుకుంటున్నారా..? అయితే భారత్ లో బెస్ట్ ట్రెక్కింగ్ ప్రదేశాలపై ఓ లుక్కేయండి..

భారత్ లో ట్రెక్కింగ్ కు అనువైన ప్రాంతాలు చాలానే ఉన్నాయి. అయితే వాటిలో ది బెస్ట్ ట్రెక్కింగ్ స్పాట్స్ అంటే ముందుగా గుర్తొచ్చేవి ఇవే.. లైఫ్ లో ఒక్కసారైనా ఇక్కడికి వెళ్లి రావాలనిపిస్తుంది.. అందులో మొదటిది ఫ్లవర్ వ్యాలీ . ఇది ఉత్తరాఖండ్ లోని హిమాలయ పర్వతశ్రేణిల్లో ఉంది. ఈ అద్భుతమైన ప్రాంతానికి ట్రెక్కింగ్ ద్వారానే చేరుకోవాలి. ఈ ప్రాంతాన్ని వ్యాలీ ఆఫ్ ఫ్లవర్స్ నేషనల్ పార్క్ గా గుర్తించారు. అలాగే 2002లో యునెస్కో ప్రపంచ వారసత్వ ప్రదేశంగానూ గుర్తించింది. ఈ ట్రెక్కింగ్ ప్రాంతం ఉత్తరాఖండ్‌ లోని చమోలి జిల్లాలో ఉంది. ఈ ప్రాంతం సముద్ర మట్టానికి సుమారు 3,352 నుండి 3,658 మీటర్ల ఎత్తులో ఉంటుంది.

కేదార్​ నాథ్ ఓ పవిత్రమైన ఆధ్యాత్మిక ప్రదేశం. ఈ ప్రాంతం ఉత్తరాఖండ్ లోని గర్హ్‌వాల్ హిమాలయాల్లో నెలకొని ఉంది. ఇది ప్రసిద్ధ హిందూ పుణ్యక్షేత్రాలైన చార్ ధామ్ యాత్రలో ఒకటిగా ఉంది. ఇక కేదార్ నాథ్ కు ట్రెక్కింగ్ ద్వారా వెళ్లడం చాలా కష్టంతో కూడుకున్నది. కేదార్​ నాథ్ ప్రాంతానికి చేరుకోవాలంటే గౌరీకుండ్​ నుంచి 16 కిలో మీటర్ల మేర ట్రెక్కింగ్​ చేయాల్సి ఉంటుంది. ఉత్తరాఖండ్ లోని మరో ప్రముఖ పర్యాటక ప్రదేశం రూప్ కుంద్.

సాధారణంగా రూప్ కుంద్ ఓ సరస్సు ప్రాంతం. ఈ లేక్ ను మిస్టరీ లేక్ అని పిలుస్తుంటారు. ఈ సరస్సు సముద్ర మట్టానికి సుమారు 16, 500 అడుగల ఎత్తులో ఉంటుంది. అందువల్ల ఇక్కడికి ట్రెక్కింగ్ ద్వారా వెళ్లడం కూడా చాలా సాహసంతో కూడుకున్నది. ఈ ప్రాంతం సుందరమైన దృశ్యాలకు, గొప్ప అనుభూతిని కలిగిస్తుంది. ట్రెక్కింగ్ కు ప్రసిద్ధి చెందిన మరో ప్రదేశం జోంగ్రీ- గోచలా ట్రెక్కింగ్. ఈ ప్రాంతం సిక్కింలో ఉంది. ఈ ప్రాంతం ట్రెక్కింగ్ లో భాగంగా కాంచనజంగ్ పర్వతశ్రేణిలోని అద్భుతమైన దృశ్యాలను తనివితీరా ఆస్వాదించవచ్చు. ఇక జోంగ్రీ- గోచలా ట్రెక్కింగ్ ప్రాంతం 40 కిలోమీటర్ల పొడవు ఉంటుంది. దీనిని పూర్తి చేయడానికి 8 నుంచి 10 రోజుల సమయం పడుతుంది.

హిమాచల్ ప్రదేశ్ అంటేనే ప్రకృతి రమణీయమైన ప్రాంతాలకు నెలవు. ఇక్కడి కొండలు, లోయలు ఎంతో ప్రసిద్ధి చెందాయి. ఇక్కడ ఖీర్గంగా ట్రెక్కింగ్ చాలా ఫేమస్. కసోల్ నుంచి ప్రారంభం అయ్యే ఈ ట్రెక్కింగ్ ను పూర్తి చేయడానికి దాదాపు 10 గంటలు పడుతుంది. పర్యటకులు ఏప్రిల్ నుంచి జూన్ వరకు అలాగే సెప్టెంబర్ నుంచి నవంబర్ మధ్య ట్రెక్కింగ్ చేస్తుంటారు. ఈ సమయంలో ఇక్కడి వాతావరణం చాలా ఆహ్లాదకరంగా ఉంటుంది.

ఇక దూద్ సాగర్ జలపాతం గురించి మనందరికీ తెలిసిందే. ఈ జలపాతం గోవా, కర్ణాటక రాష్ట్రాల సరిహద్దులో పశ్చిమ కనుమలలో ఉంటుంది. చుట్టూ దట్టమైన అడవి ఉంటుంది. ఈ జలపాతాన్ని సందర్శించడానికి జూన్ నుంచి సెప్టెంబర్ మంచి టైమ్ అని చెబుతుంటారు. ఈ సమయంలో ఈ ప్రాంతంలోని వాతావరణం ట్రెక్కింగ్ కు అనుకూలంగా ఉంటుంది.