ఏకంగా రూ. 54.1 లక్షల కోట్ల బడ్జెట్: ఆర్థిక తలరాత మార్చేలా

కేంద్ర ఆర్థిక శాఖ మంత్రి నిర్మలా సీతారామన్ నేడు లోక్‌సభలో వార్షిక బడ్జెట్ ను ప్రవేశపెట్టనున్నారు. ఈ ఉదయం సరిగ్గా 11 గంటలకు బడ్జెట్ ప్రసంగం ప్రారంభమౌతుంది. దాదాపుగా మూడు గంటల పాటు ఏకధాటిగా కొనసాగే అవకాశం ఉంది. ఇది- ఆమె వరుసగా సమర్పించనున్న తొమ్మిదో బడ్జెట్ కావడం ప్రాధాన్యతను సంతరించుకుంది. పార్లమెంటరీ చరిత్రలో ఓ అరుదైన మైలురాయిగా నిలువనుంది.

నిర్మలా సీతారామన్ 2026-27 ఆర్థిక సంవత్సరానికి సుమారు 54.1 లక్షల కోట్ల రూపాయల బడ్జెట్‌ను సమర్పించే అవకాశం ఉందని తెలుస్తోంది. వార్షిక వృద్ధి రేటు 7.9 శాతంగా అంచనా వేసి, బడ్జెట్ ప్రతిపాదనలను రూపొందించినట్లు సమాచారం. 2023-24 ఆర్థిక సంవత్సరాల సగటు జీడీపీలో 14.8 శాతంగా ఉన్న మొత్తం వ్యయం ఈ ఏడాది బడ్జెట్ అంచనాల్లో జీడీపీలో 14.2 శాతం అంటే రూ. 50.65 లక్షల కోట్లుగా నమోదైంది.

నామమాత్రపు జీడీపీ రేటు, ఆదాయ వృద్ధి మందగించడం వల్ల సవరించిన అంచనాల్లో ఈ టోటల్ ఎక్స్ పెండిచర్ 14.0 శాతం అంటే రూ. 50.15 లక్షల కోట్లకు తగ్గవచ్చని తాజా నివేదిక అంచనా వేసింది. ఈ ఆర్థిక సంవత్సరంలో మొత్తం వ్యయం రూ. 54.1 లక్షల కోట్లుగా అంచనా వేస్తోన్నామని, ఇది 7.9 శాతం వార్షిక వృద్ధిని సూచిస్తుందని పేర్కొంది. ఇది- ద్రవ్య స్థిరీకరణతో కూడుకుని ఉంటుందని స్పష్టం చేసింది. దీనివల్ల జీడీపీలో టోటల్ ఎక్స్ పెండిచర్ సుమారు 13.8 శాతానికి తగ్గే అవకాశం ఉంది.

2026-27 ఆర్థిక సంవత్సరంలో ద్రవ్య లోటు లక్ష్యం జీడీపీలో 4.16 శాతంతో 16.37 లక్షల కోట్లు ఉంటుంది. ఈ ఏడాది మార్చి 31వ తేదీ నాటికి ముగిసే ప్రస్తుత ఆర్థిక సంవత్సరం బడ్జెట్ అంచనాల్లో ఇది జీడీపీలో 4.4 శాతంతో రూ. 15.69 లక్షల కోట్లు. సంఖ్యా పరంగా లోటు పెరిగినప్పటికీ- జీడీపీలో దాని వాటా తగ్గడం ద్రవ్య సుస్థిరీకరణ దిశగా కొనసాగుతున్న పురోగతిని సూచిస్తుందని ఆర్థిక మంత్రిత్వ శాఖ వర్గాలు చెబుతున్నాయి.

సెంట్రల్ స్టాటిస్టికల్ అధికార వర్గాలు అందించిన వివరాల ప్రకారం- ప్రస్తుత ఆర్థిక సంవత్సరానికి వాస్తవ జీడీపీ వృద్ధి 7.4 శాతంగా అంచనా వేశారు. వాస్తవ ఆర్థిక కార్యకలాపాల్లో దాదాపు ఆరేళ్ల కాలంలో అత్యంత తక్కువ నామమాత్రపు జీడీపీ వృద్ధి (సుమారు 8 శాతం)కి విరుద్ధంగా ఉంటోంది. నామమాత్రపు పన్నుల వృద్ధి, మొత్తం రాబడి వసూళ్లను ఇది ప్రభావితం చేసిందని, ఫలితంగా రాష్ట్రాలకు కేంద్ర పన్నులు, ఇతర సుంకాలను పంపిణీ చేయడం తగ్గించిందని నివేదిక పేర్కొంది.

English summary

Union Budget 2026-27 by the Union Finance Minister Nirmala Sitharaman is expected to present a Rs 54.1 lakh crore Union Budget for FY2026-27, registering a year-on-year growth of 7.9 per cent, according to a report by Sunidhi Securities and Finance Limited.