ఆగ్రహంతో పోలీస్‌స్టేషన్‌కు భార్య..: భర్త పాటతో కౌగిట్లో వాలింది(వీడియో)

ఝాన్సీ: ఆ భార్యాభర్తల మధ్య ఏదో చిన్న గొడవ జరిగింది. దీంతో ఆగ్రహం వ్యక్తం చేస్తూ ఫిర్యాదు చేసేందుకు ఆమె పోలీస్ స్టేషన్ వరకూ వెళ్లింది. ఎంత బతిమాలినా వినలేదు. అయితే, ఆమె భర్త ఆమె కోసం ఓ చక్కని పాట పాడాడు. దీంతో ఆమె కోపం పూర్తిగా చల్లారిపోయి భర్త కౌగిట్లో చేరిపోయింది. ఈ ఘటన ఉత్తరప్రదేశ్ రాష్ట్రంలోని ఝాన్సీలో చోటు చేసుకుంది.

వివరాల్లోకి వెళితే.. భర్తతో అభిప్రాయ భేదాలు రావడంతో పుట్టింటికి వెళ్లిపోయింది ఓ భార్య. ఆ భార్యను ఇంటికి తీసుకురావడానికి వెళ్లిన భర్తకు నిరాశ ఎదురైంది. అంతేగాక, అతనిపై పోలీసుస్టేషన్‌లో ఫిర్యాదు కూడా చేసింది. దీంతో పోలీసులు భార్య భర్తలకు కౌన్సెలింగ్‌ ఇవ్వాలని నిర్ణయించారు.

ఈ క్రమంలో ఇద్దరినీ పోలీస్టేషన్‌కు పిలిపించారు. అక్కడ కూడా తన భర్తపై ఆగ్రహం వ్యక్తం చేస్తూనే ఉంది భార్య. దీంతో ఆమెను శాంతింపజేయాలనుకున్న భర్త తన తియ్యని గొంతుతో ఓ చక్కని పాట అందుకున్నాడు.

'జినా..జినా..' అంటూ 'బాద్లాపూర్‌' సినిమాలోని పాటను పాడాడు. ఇంకేముంది.. ఆ భార్య కంటతడి పెట్టుకుంటూ వచ్చి భర్త కౌగిలిలో వాలిపోయింది. ఇదంతా అక్కడున్న వారు ఎవరో వీడియో తీశారు. ప్రస్తుతం ఈ వీడియో వైరల్‌గా మారింది. సదరు భర్తపై నెటిజన్లు ప్రశంసల వర్షం కురిపిస్తున్నారు.

English summary

A Husband Sings a Romantic Song For Unhappy Wife in police station in Jhansi.