నటనకు ఎంపీ రమ్య గుడ్బై: విమర్శల భయం వల్లేనా?
ఈ సందర్భంగా ఆమె మీడియాతో మాట్లాడుతూ, రెండు మూడు రోజుల్లో ఈ సినిమా షూటింగ్ పూర్తవుతుందని, దిల్ కా రాజా, నీర్ దోసె, కోడిరామకృష్ణ దర్శకత్వంలో తెలుగు, కన్నడ భాషలలో తెరకెక్కుతున్నసినిమాలు పెండింగ్లో ఉన్నాయని చెప్పారు. ఈ సినిమాలు పూర్తయిన తర్వాత కొత్త చిత్రాలను అంగీకరించనని తెలిపారు.
నటన, రాజకీయాలకు ఒకేసారి న్యాయం చేయలేనని భావించే ఈ నిర్ణయం తీసుకున్నానని వెల్లడించారు. ఇక పూర్తిగా రాజకీయాల్లో ఉంటానని తెలిపారు. కొత్తగా ఒక్క సినిమాను అంగీకరించలేదన్నారు. ఒక సినిమా పూర్తి కావాలంటే నలభై రోజుల వరకు సమయం పడుతుందని, ఈ రోజుల్లో ప్రజలకు దూరంగా ఉండవలసి వస్తోందన్నారు. మరో పదేళ్ల తర్వాత శివరాజ్ కుమార్ సోదరిగా నటించే అవకాశం వస్తే తప్పకుండా చేస్తానన్నారు.
కాగా, రమ్య ప్రకటనపై కన్నడ సినీ, రాజకీయ వర్గాల్లో భిన్న కథనాలు వినిపిస్తున్నాయి. సార్వత్రిక ఎన్నికలు సమీపిస్తున్న నేపథ్యంలో.. సినిమాలలో నటిస్తూ, ప్రజలకు ఎలా అందుబాటులో ఉంటారని ఎన్నికల ప్రచారంలో ప్రత్యర్థులు విమర్శలు ఎక్కుపెట్టే అవకాశాలున్నాయి. వాటిని అడ్డుకోవడానికే రమ్య ముందు జాగ్రత్తగా ఇలాంటి ప్రకటన చేసి ఉంటారని అంటున్నారు. ప్రస్తుతం మాండ్య ఎంపీగా ఉన్న ఆమె సార్వత్రిక ఎన్నికల్లో పోటీ చేయనున్నారు.
Click it and Unblock the Notifications
Sign in with Google