ఈవ్ టీజింగ్ అడ్డుకున్నందుకు డ్యాన్స్ టీచర్ హత్య
రాంచీ: జార్ఖండ్ రాష్ట్రంలోని జంషెడ్పూర్లో దారుణ ఘటన చోటుచేసుకుంది. ఈవ్ టీజింగ్ అడ్డుకున్నందుకు ఓ 19ఏళ్ల డ్యాన్స్ టీచర్ను ఓ దుండగుడు కాల్చి చంపేశాడు. ఘటనపై కేసు నమోదు చేసుకున్న పోలీసులు, నిందితుడి కోసం గాలిస్తున్నారు.
పోలీసులు తెలిపిన వివరాల ప్రకారం.. ఇంటర్మీడియట్ చదువుతున్న సుమిత్ గొరాయ్ అనే యువకుడు పిల్లలకు డ్యాన్స్ కూడా నేర్పిస్తున్నాడు. మంగళవారం తన దగ్గర డ్యాన్స్ నేర్చుకునే ఓ విద్యార్థినిని శాంతినగర్లో ఆమె ఇంటి దగ్గర దింపుతుండగా ఓ వ్యక్తి బైకుపై వచ్చి అతనిపై కాల్పులు జరిపాడు.
గమనించిన స్థానికులు వెంటనే అతడ్ని ఆస్పత్రికి తరలించారు. అయితే అప్పటికే సుమిత్ మృతి చెందాడని వైద్యులు తెలిపారు.
కాగా, ఘటనపై పోలీసులు విచారణ చేపట్టగా.. నిందితుడు రెండో రోజులుగా ఓ విద్యార్థినిని వేధిస్తుండటంతో డ్యాన్స్ టీచర్ అడ్డుకున్నాడని, ఈ విషయమై ఇద్దరి మధ్య తగాదా వచ్చిందని తేలింది.
ఈ నేపథ్యంలోనే నిందితుడు సుమిత్ను కాల్చి చంపాడని తెలిసింది. కేసు నమోదు చేసుకున్న పోలీసులు, నిందితుడి కోసం గాలిస్తున్నారు.