14 హిందూ దేవాయలపై దాడి, ధ్వంసం: ఎక్కడంటే.

బంగ్లాదేశ్ వాయువ్య ప్రాంతంలో ఏకంగా 14 హిందూ దేవాలయాలపై దాడులు చేసిన దుండగులు పూర్తిగా ధ్వంసం చేశారు. ఈ మేరకు వివరాలను పోలీసులు ఆదివారం తెలిపారు.

ఢాకా: పాకిస్థాన్‌తోపాటు బంగ్లాదేశ్‌లోనూ మైనార్టీలైన హిందువులపై దాడులు పెరిగిపోతున్నాయి. బంగ్లాదేశ్ వాయువ్య ప్రాంతంలో ఏకంగా 14 హిందూ దేవాలయాలపై దాడులు చేసిన దుండగులు పూర్తిగా ధ్వంసం చేశారు. ఈ మేరకు వివరాలను పోలీసులు ఆదివారం తెలిపారు.

రాత్రి సమయంలో ఒక్కసారిగా దుండగులు దాడి చేసి 14 హిందూ దేవాలయాలను ధ్వంసం చేశారని స్థానిక బలియడంగీకి చెందిన హిందూ నేత బైద్యనాథ్ బర్మాన్ తెలిపారు. కొన్ని విగ్రహాలు ధ్వంసమయ్యాయని, ఆలయ స్థలాల్లోని చెరువు నీటిలో కొన్ని కనిపించాయని ఉపజిల్లా పూజా సెలబ్రేషన్ కౌన్సిల్ ప్రధాన కార్యదర్శి అయిన బర్మాన్ వెల్లడించారు.

దేవాలయాలపై దాడులు చేసి ధ్వంసానికి పాల్పడిన నిందితులను కఠినంగా శిక్షించి తమకు న్యాయం చేయాలని ప్రభుత్వాన్ని డిమాండ్ చేశారు బర్మన్. మరో హిందూ నేత, యూనియన్ పరిషద్ చైర్మన్ సమర్ ఛటర్జీ మాట్లాడుతూ.. దేవాలయాలపై దాడులు చేసి ధ్వంసం చేయడం హేయమైన చర్య అని మండిపడ్డారు. ఇలాంటి ఘటనలు ఇక్కడ గతంలో ఎన్నడూ జరగలేదని చెప్పారు.

స్థానిక మెజార్టీ ముస్లింలతో తాము కలిసి జీవిస్తున్నామని, వారు కూడా మాతో బాగానే ఉంటారని.. అయితే, ఈ దాడులు ఎవరు పాల్పడ్డారనే విషయం మాత్రం తెలియరావడం లేదని ఛటర్జీ తెలిపారు.

ఈ ప్రాంతంలోని పలు దేవాలయాలపై శనివారం అర్ధరాత్రి తర్వాత దేవాలయాలపై దాడులు జరిగాయని బలియడంగి పోలీస్ స్టేషన్ ఇంఛార్జ్ అధికారి ఖైరుల్ ఆనమ్ తెలిపారు. దేశంలోని శాంతియుత వాతావరణాన్ని చెడగొట్టేందుకే దుండగులు ఈ దాడులకు పాల్పడుతున్నారని మరో పోలీస్ ఉన్నతాధికారి జహంగీర్ హోస్సేన్ ఆరోపించారు.

దేవాలయాలపై దాడులు చేసి, విధ్వంసం చేసిన నిందితులను పట్టుకుని చర్యలు తీసుకుంటామని ఆయన తెలిపారు. ఇలాంటి దాడులకు పాల్పడినవారికి కఠిన శిక్షలు పడాల్సిన అవసరం ఉందని వ్యాఖ్యానించారు.

English summary

14 Hindu Temples Vandalised In Bangladesh.