106ఏళ్ల బామ్మ ఒబామాతో చిందేసింది(వీడియో)

వాషింగ్టన్: ఆమె 106ఏళ్ల ఓ బామ్మ. ఆమె ఉత్సాహం అమెరికా అధ్యక్షుడు బరాక్ ఒబామాతో స్టెప్పులేయించింది. సతీసమేతంగా ఒబామా ఆ బామ్మతో కలిసి డ్యాన్స్ చేశారు. కాగా, వైట్‌హౌజ్‌లో ఆవిష్కృతమైన ఈ అరుదైన దృశ్యం ఇప్పుడు వైరల్‌గా మారి ఇంటర్నెట్‌లో హల్‌చల్ చేస్తోంది.

అమెరికాలోని ఓ మారుమూల గ్రామానికి చెందిన వర్జీనియా మెక్‌లౌరిన్ అనే 106ఏళ్ల వృద్ధురాలికి ఎప్పట్నుంచో అధ్యక్ష భవనం వైట్‌హౌస్‌కు వెళ్లాలని కోరిక. దీనికోసం ఇటీవల ఒబామాకు దరఖాస్తు పెట్టుకుంది. స్పందించిన ఒబామా ఆమెను ఆహ్వానించగా.. ఆదివారం ఆ వృద్ధురాలు అక్కడికి చేరుకుంది.

ఒబామా తన సతీమణి మిచెల్లీతో కలిసి వర్జీనియా దగ్గరకు వచ్చారు. వాళ్ల రాకను గమనిస్తూనే ఆ బామ్మ ఒక్కసారిగా ఉత్సాహంతో ఊగిపోయింది. స్టెప్పులేస్తూ ఒబామా దంపతులను పలుకరించింది. ‘నాతో డ్యాన్స్ చేసే సత్తా మీకుందా?' అంటూ వారికి సవాల్ విసిరింది. దీంతో మిచెల్లీ ఊరుకోలేదు.. ఆమెతో కలిసి స్టెప్పులేశారు.

ఆ తర్వాత తన భర్త ఒబామాతో కూడా వేయించింది. ఇంత వయసులో ఉత్సాహంగా వర్జీనియా డ్యాన్స్ చేయడాన్ని చూసి ఒబామా ఆశ్చర్యపోయారు. వైట్‌హౌస్‌లో అడుగుపెట్టే అవకాశం తనకు దక్కుతుందని ఊహించలేదని వర్జీనియా ఈ సందర్భంగా వ్యాఖ్యానించింది. నల్లజాతీయుడు అమెరికా అధ్యక్షుడిగా ఉండటం ఎంతో ఆనందంగా ఉందని, తానూ నల్లజాతీయురాలినేనని తెలిపింది

English summary

Virginia McLaurin waited all her life to see an African-American in the White House. So, when she finally got a chance to meet President Obama, the 106-year-old woman couldn't contain her excitement.