అఫ్గానిస్తాన్‌: కుందుజ్‌లోని మసీదుపై ఆత్మాహుతి దాడి, 50 మందికి పైగా మృతి

By Bbc Telugu

Updated: Friday, October 8, 2021, 22:13 [IST]

అఫ్గానిస్తాన్‌లోని కుందుజ్ నగరంలో జరిగిన ఆత్మాహుతి బాంబు దాడిలో 50 మందికి పైగా చనిపోయారు. అమెరికా సేనలు దేశం విడిచి వెళ్లిపోయిన తరువాత జరిగిన అత్యంత భీకరమైన దాడి ఇదేనని అధికారులు తెలిపారు.

మైనారిటీ షియా ముస్లింలు ప్రార్థనలు చేసే సయీద్ అబద్ మసీదులో మృతదేహాలన్నీ చెల్లాచెదురుగా పడి ఉన్నాయి. ఈ దాడిలో 100 మందికి పైగా గాయపడ్డారు.

ఈ దాడికి పాల్పడింది ఎవరన్నది ఇంకా తెలియలేదు. అయితే, స్థానిక ఇస్లామిక్ స్టేట్ గ్రూప్‌తో పాటు సున్నీ ముస్లిం తీవ్రవాదులు షియాలను లక్ష్యంగా చేసుకున్నట్లు భావిస్తున్నారు.

ఇస్లామిక్ స్టేట్ గ్రూప్‌నకు చెందిన అఫ్గాన్ ప్రాంతీయ అనుబంధ సంస్థ అయిన ఐఎస్-కె మొదటి నుంచీ తాలిబాన్ల అధికారాన్ని తీవ్రంగా వ్యతిరేకిస్తోంది. ఇటీవలి కాలంలో చాలా సార్లు బాంబు దాడులకు పాల్పడింది. ముఖ్యంగా, అది తూర్పు అఫ్గాన్‌లో దాడులు చేస్తోంది.