మహిళ బాధ: యాంకర్కు కన్ను గీటిన ఆస్ట్రేలియా పిఎం
మెల్బోర్న్: ఆస్ట్రేలియా ప్రధాని టోనీ అబ్బట్ తాజాగా ఓ వివాదంలో చిక్కుకున్నారు. ఆస్ట్రేలియన్ బ్రాడ్ కాస్ట్ కార్పొరేషన్(ఏబిసి) రేడియో స్టేషన్లో ఫోన్-ఇన్ కార్యక్రమంలో పాల్గొన్న అబ్బట్ ఓ మహిళ వేసిన ప్రశ్నకు సమాధానం చెప్పే ముందు యాంకర్ వైపు చూస్తూ కొంటెగా కన్ను గీటారు.
ప్రభుత్వం చేపట్టిన పొదుపు చర్యల వల్ల తమ బతుకు దుర్భరమైందని చెబుతూ ఓ 67 ఏళ్ల మహిళ తన కష్టాలను వెల్లబుచ్చుకుంది. తాను పొట్ట నింపుకునేందుకు ఫోన్ సెక్స్ ఉద్యోగం చేయాల్సి వస్తోందని తెలిపింది. ఆ మాట వినగానే టోనీ అబ్బట్ యాంకర్ వైపు చూస్తూ కన్ను గీటారు.
ఈ వీడియో ఇప్పుడు ఇంటర్ నెట్లో హల్ చల్ చేస్తోంది. దీంతో ప్రధాని చేసిన కొంటే చేష్టపై తీవ్ర విమర్శలు వ్యక్తమవుతున్నాయి. ఓ మహిళ తన బాధను చెప్పుకుంటుంటే.. అది అర్థం చేసుకోకుండా ఈ విధంగా స్పందించడంపై పలువురు విమర్శనాస్త్రాలు ఎక్కుపెట్టారు.
ఆ వీడియోను చూసిన పలువురు సోషల్ మీడియాలో టోనీ అబ్బట్పై విమర్శల వర్షం కురిపిస్తున్నారు. ఇది ఇలా ఉండగా ప్రధాని అబ్బట్కు ఈ ఘటనతో అంతర్జాలంలో తెగ ప్రచారం లభిస్తోంది.