తప్పిన ముప్పు: రన్‌వే నుంచి అదుపు తప్పి నదిలో ల్యాండ్ అయిన బోయింగ్ విమానం

ఫ్లోరిడా: ఫ్లోరిడాలో పెద్ద విమాన ప్రమాదం తప్పింది. జాక్సన్‌విల్లే విమానాశ్రయంలో ల్యాండ్ అయిన తర్వాత రన్‌వేకి చివరగా ఉన్న సెయింట్ జాన్సన్‌ నదిలోకి విమానం దూసుకెళ్లింది. ప్రమాదం జరిగిన సమయంలో విమానంలో మొత్తం 136 మంది ఉన్నారు. గ్వాంటనామో బే నుంచి జాక్సన్‌విల్లేకు బోయింగ్ 737 విమానం బయలు దేరింది. స్థానిక కాలమాన ప్రకారం రాత్రి 9గంటల 40 నిమిషాలకు ల్యాండ్ అయిన జంబో విమానం ఒక్కసారిగా నదిలోకి దూసుకెళ్లింది.

#JSO Marine Unit was called to assist @NASJax_ in reference to a commercial airplane in shallow water. The plane was not submerged. Every person is alive and accounted for. pic.twitter.com/4n1Fyu5nTS

— Jax Sheriff's Office (@JSOPIO) May 4, 2019

విమానం నదిలోకి దూసుకెళ్లగానే విమానంలోని ప్రయాణికులు భయాందోళనలతో వణికిపోయారు. బయట ఏం జరుగుతోందో తెలియని పరిస్థితి. చిమ్మ చీకటిలో ఏమీ కనిపించకపోవడంతో ప్రయాణికులు భయపడ్డారు. ఇదిలా ఉంటే ఘటనపై విచారణకు ఆదేశించినట్లు అధికారులు తెలిపారు. విమానంలో ఉన్నవారంతా క్షేమంగా ఉన్నట్లు జాక్సన్‌విల్లే మేయర్ ట్విటర్ ద్వారా తెలిపారు. విమానం నదిలోకి దూసుకెళ్లడంతో విమానం ఇంధనం కాస్త లీక్ అయినట్లు సమాచారం. ఘటన జరిగిన వెంటనే ఎమర్జెన్సీ సిబ్బంది రంగంలోకి దిగి పరిస్థితిన పర్యవేక్షిస్తున్నట్లు అధికారులు తెలిపారు.

ఇదిలా ఉంటే విమానం రన్‌వేపై ఎలా స్కిడ్ అయ్యిందనే దానిపై విచారణ చేస్తున్నారు. పైలట్ల తప్పిదం ఏమైనా ఉందా లేక ఏదైనా సాంకేతిక సమస్య తలెత్తిందా అనే కోణంలో కూడా అధికారులు విచారణ చేస్తున్నారు. ఏది ఏమైనప్పటికీ ప్రయాణికులంతా క్షేమంగా ఉండటంతో అంతా ఊపిరి పీల్చుకున్నారు.

English summary

All passengers and crew on a Boeing 737 aircraft have escaped with their lives after the plane skidded off the runway at Jacksonville airport in Florida and landed in a river.