తండ్రి మీద అలిగి ఎంత పనిచేశాడంటే: చూస్తే గుండెలదిరిపోవాల్సిందే.. (వీడియో)

బీజింగ్: పిల్లల్ని పెంచి పెద్ద చేయడమంటే మామూలు విషయం కాదు. అసలే ఈరోజుల్లో అందరి మనోభావాలు ఇట్టే దెబ్బతింటున్నాయి. ఇక పిల్లల మనోభావాలు దెబ్బ తింటే ఇంకేమైనా ఉందా?.. ఇల్లు పీకి పందిరేసేయరు.. కొంతమంది గడుగ్గాయిలైతే తల్లిదండ్రులు ఏమైనా అంటే చాలు.. వాళ్ల గుండెలదరిపోయేంత పనిచేస్తారు.

చైనాలో ఓ 12ఏళ్ల బాలుడు కూడా వారి తల్లిదండ్రులకు ఇలాగే ముచ్చెమటలు పట్టించాడు. సౌత్ చైనా మార్నింగ్ పోస్ట్ ఈ కథనాన్ని వెలుగులోకి తెచ్చింది. ఉదయాన్నే నిద్రలేవడని, ఎప్పుడూ బద్దకంగా ఉంటాడని తండ్రి తిట్టినందుకు ఆ బాలుడు బాగా అలిగాడట. తండ్రి మీద కోపంతో.. ఏకంగా బెడ్ రూమ్ కిటికీలో నుంచి బయటకు వెళ్లి, దాని కిందే ఉన్న మరో కిటికీపై చేతులు కట్టుకుని పడుకున్నాడు.

ఐదో అంతస్తులో ఉన్న ఆ కిటికీపై ఏమాత్రం భయం లేకుండా ఆ బాలుడు హాయిగా పడుకోవడం గమనార్హం. విషయం తెలుసుకున్న తల్లిదండ్రుల గుండెలు అదిరిపోయాయి. వెంటనే పోలీసులకు ఫిర్యాదు చేయగా.. వారు అగ్నిమాపకశాఖ వారిని అక్కడికి పంపించారు. దీంతో ఫైర్ సిబ్బంది తమ వద్ద ఉన్న సేఫ్టీ నిచ్చెనతో అతన్ని కిందకు దించారు. దీనికి సంబంధించిన వీడియో ప్రస్తుతం సోషల్ మీడియాలో హల్ చల్ చేస్తోంది.

English summary

The 12-year-old was filmed sleeping on the ledge of the fifth floor window of an apartment building. According to South China Morning Post, the boy's father scolded him for being too lazy to get out of bed which is when he climbed out of his bedroom window.