అచ్చం సినిమాలోలాగే: 3ఏళ్ల బాలుడిని కాల్చాడు

న్యూయార్క్: 3 ఏళ్ల బాలుడిని 11 ఏళ్ల బాలుడు కాల్చిచంపిన ఘటన అమెరికాలోని మిచిగాన్ రాష్ట్రంలో చోటు చేసుకుంది. పోలీసుల కథనం ప్రకారం ఈ ఘటనకు సంబంధించిన వివరాలిలా ఉన్నాయి. 11 ఏళ్ల బాలుడు డెట్రాయిట్‌లోని తన తండ్రి నివాసానికి వచ్చాడు.

సోమవారం తండ్రి ఇంట్లో లేని సమయంలో బెడ్‌రూమ్‌లో ఉన్న హ్యాండ్ గన్‌ను తీసుకున్నాడు. అనంతరం ఆడుకునేందుకు ఇంటికి వెనుక వైపు ఉన్న కారు వద్దకు వెళ్లాడు. అక్కడ కారులో ఆడుకుంటున్న 3 ఏళ్ల బాలుడు ఎలిజా వాకర్ వద్దకు వెళ్లి అతనిపై పాయింట్ బ్లాంక్ రేంజిలో కాల్పులు జరిపాడు.

దీంతో ఎలిజా వాకర్ అక్కడికక్కడే మృతి చెందాడు. సంఘటనా స్ధలానికి చేరుకున్న పోలీసులు బాలుడిని అదుపులోకి తీసుకుని కోర్టులో హాజరుపరిచారు. ఎలాంటి కారణం లేకుండా నిందితుడు కాల్పులు జరిపాడని, ఇది కావాలని చేసిందేనని భావించి అతడిపై హత్య అభియోగాలు నమోదు చేసినట్టు ప్రాసిక్యూటర్ తెలిపారు.

అయితే బాలుడి తల్లిదండ్రులు మాత్రం ఆడుకునే బొమ్మ తుపాకి అనుకుని కాల్చి ఉంటాడని, ఇందుకు తక్కువ శిక్ష వేయాల్సిందిగా జడ్జిని కోరారు. ఐదువేల డాలర్లు పూచీకత్తుగా కట్టి బాలుడిని బెయిల్‌పై తల్లిదండ్రులు విడిపించారు.

English summary

An 11-year-old Detroit boy was arrested after he allegedly killed a 3-year-old with a handgun Monday — a rare case involving a suspect so young, local prosecutors say.