గొడుగు మూయలేకపోయిన డొనాల్డ్ ట్రంప్, నెటిజన్ల సెటైర్లు
వాషింగ్టన్: అమెరికా అధ్యక్షులు డొనాల్డ్ ట్రంప్ ఓ గొడుగును మూయలేకపోయాడట. దీనిపై సోషల్ మీడియాలో సెటైర్లు వస్తున్నాయి. సోమవారం ఇల్లినాయిస్లో జరుగుతున్న ఓ కార్యక్రమానికి హాజరయ్యేందుకు విమానంలో బయలుదేరారు.
గాలి ఎక్కువగా వీస్తుండటంతో ఆయన తన గొడుగు తీసుకొని విమానం ఎక్కారు. విమానం లోనికి వెళ్తున్న సమయంలో ట్రంప్ గొడుగు మూసేందుకు ప్రయత్నించారు. కానీ దానిని మూయలేకపోయారు.
దాంతో గొడుగును మూయకుండానే లోపలకు వెళ్లిపోయారు. గాలికి ఆ గొడుగు ఊగుతూ విమానం ద్వారం వద్దే ఉండింది. ఆ సమయంలో మీడియా ఫోటోలు తీసింది. ఇందుకు సంబంధించిన వీడియోలు సోషల్ మీడియాలో వైరల్ అవుతున్నాయి. దీనిపై నెటిజన్లు సెటైర్లు వేస్తున్నారు.
ట్రంప్కు గొడుగు ఎలా మూయాలో కూడా తెలియదని, చేతిలో ఉన్న గొడుగునే మూయలేకపోయారు, బాత్రూంకు వెళ్తే ఫ్లష్ కూడా చేయరేమోనని, ట్రంప్ తెల్లగా ఉంటారని, అందుకే నల్లటి గొడుగును పట్టించుకోలేదని, పనివాళ్లు వచ్చి మూస్తారని భావించాడేమోననే సెటైర్లు వేస్తున్నారు.