Iran-Israel War: ఆపుతారా లేదా ? అటు ట్రంప్, ఇటు భారత్ ..!

అమెరికా-ఇరాన్ మధ్య ఘర్షణలు తగ్గుముఖం పట్టి ఒప్పందం దిశగా ఇరుదేశాలూ అడుగులు వేస్తున్న తరుణంలో మధ్యలో దూరి లెబనాన్ పై భారీ ఎత్తున దాడులకు దిగిన ఇజ్రాయెల్ పశ్చిమాసియాలో మొత్తం పరిస్ధితినే ఉద్రిక్తంగా మార్చేసింది. లెబనాన్ పై ఇజ్రాయెల్ దాడులకు ప్రతీకారంగా ఇరాన్ ఆ దేశంపై దాడులకు దిగింది. దీంతో తిరిగి ఇజ్రాయెల్ ప్రతీకార దాడులు చేస్తోంది. ఈ నేపథ్యంలో ఇజ్రాయెల్ తీరుపై ఆగ్రహంగా ఉన్న అమెరికా అధ్యక్షుడు ట్రంప్ ఇప్పటికే హెచ్చరికలు కూడా చేశారు.

ఇవాళ మరోసారి ఇరాన్-ఇజ్రాయెల్ ఉద్రిక్తతల (Iran-Israel War)పై అమెరికా అధ్యక్షుడు ట్రంప్ తో పాటు భారత్ కూడా స్పందించింది. ఇవాళ తెల్లవారుజామున సోషల్ మీడియా సందేశంలో.. ఇజ్రాయెల్, ఇరాన్ రెండూ తమ తాజా పోరాటానికి ఒక ముగింపు మార్గాన్ని కోరుకుంటున్నాయని ట్రంప్ తెలిపారు. తుది చర్చలలో తక్షణ కాల్పుల విరమణ కోసం ఇజ్రాయెల్, ఇరాన్ ఇరుపక్షాలు ఎదురు చూస్తున్నాయన్నారు. అజ్ఞానం లేదా మూర్ఖత్వం అడ్డుపడితే శాంతి ముందుకు సాగదన్నారు. తుది ఒప్పందం కుదిరే వరకు దిగ్బంధనం పూర్తి స్థాయిలో కొనసాగుతుందని, విషయాలు త్వరగా ముందుకు సాగాలని ట్రంప్ కోరారు.

ఇటు భారత్ కూడా ఇరాన్-ఇజ్రాయెల్ తాజా ఉద్రిక్తలపై ఆందోళన వ్యక్తం చేసింది. పశ్చిమాసియాలో తాజా పరిణామాలు విచారకరమని, 100 రోజులకు పైగా సాగుతున్న ఘర్షణల్లో ఇప్పటికే భారీ నష్టం వాటిల్లిందని గుర్తుచేసింది. ఇది ప్రపంచ ఆర్ధిక వ్యవస్థ, ఇంధన సరఫరాలపై తీవ్ర ప్రభావం చూపినట్లు వెల్లడించింది. కాబట్టి ఉద్రిక్తతలకు తక్షణం ముగింపు పలకాలని, పౌరులకు హాని లేకుండా చూడాలని ఇరాన్, ఇజ్రాయెల్ కు సూచించింది. శాంతి చర్చల్ని త్వరగా పూర్తి చేయాలని కూడా తెలిపింది. మరోవైపు ఇజ్రాయెల్ మళ్లీ లెబనాన్ పై దాడులు చేస్తే తప్ప తాము తిరిగి దాడులు చేయబోమని ఇరాన్ సైన్యం ప్రకటించింది. ఇజ్రాయెల్ మాత్రం ఇరాన్ తో దీర్ఘకాలిక పోరుకు సిద్దంగా ఉన్నట్లు చెప్పుకొచ్చింది.